NWKRTC | HRMS & Nyaya Patha | ಮಾನವ ಸಂಪನ್ಮೂಲ ನಿರ್ವಹಣಾ ವ್ಯವಸ್ಥೆ | ನ್ಯಾಯಪಥ

NWKRTC… ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆ… ಉತ್ತರ ಕರ್ನಾಟಕದ ಜನರ ಜೀವನಾಡಿ… ದಶಕಗಳಿಂದ ಜನಸೇವೆಯ ಧ್ಯೇಯದೊಂದಿಗೆ, ನಂಬಿಕೆ, ಸುರಕ್ಷತೆ ಮತ್ತು ವಿಶ್ವಾಸಾರ್ಹ ಸೇವೆಯ ಸಂಕೇತವಾಗಿ ಈ ಸಂಸ್ಥೆ ನಿರಂತರವಾಗಿ ಮುನ್ನಡೆಯುತ್ತಿದೆ. ಬೆಳಗಿನ ಮೊದಲ ಬಸ್ ಹೊರಡುವ ಕ್ಷಣದಿಂದ ರಾತ್ರಿ ಕೊನೆಯ ಕಾರ್ಯಾಚರಣೆ ಮುಗಿಯುವ ತನಕ ಸಾವಿರಾರು ನಿಷ್ಠಾವಂತ ಸಿಬ್ಬಂದಿಗಳ ಪರಿಶ್ರಮ ಈ ಸಂಸ್ಥೆಯ ನಿಜವಾದ ಶಕ್ತಿ… ಆದರೆ, ಈ ಮಹತ್ವದ ಸಾರ್ವಜನಿಕ ಸೇವೆಯ ಹಿಂದೆ, ಆಡಳಿತ ವ್ಯವಸ್ಥೆಯ ಬಹುಪಾಲು ಪ್ರಕ್ರಿಯೆಗಳು ಕಾಗದ ಆಧಾರಿತವಾಗಿದ್ದವು… ಬೇಕಾದ ಮಾಹಿತಿ ಪಡೆಯುವಲ್ಲಿ ವಿಳಂಬವಾಗುತ್ತಿತ್ತು … ಸಮಯೋಚಿತ ನಿರ್ಧಾರ ಕೈಗೊಳ್ಳುವಲ್ಲಿ ಅಡಚಣೆಯಾಗುತ್ತಿತ್ತು… ಈ ಹಿನ್ನೆಲೆಯಲ್ಲಿ ಪರಿಣಾಮಕಾರಿ ಆಡಳಿತಕ್ಕಾಗಿ NWKRTC ಹೆಮ್ಮೆಯಿಂದ ಅನಾವರಣಗೊಳಿಸುತ್ತಿದೆ… ತನ್ನ ಡಿಜಿಟಲ್ ಪರಿವರ್ತನೆಯ ಹೊಸ ಅಧ್ಯಾಯವನ್ನು… 1. HRMS (Human Resource Management System) ಮತ್ತು Payroll ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯಲ್ಲಿ ಮಾನವ ಸಂಪನ್ಮೂಲ ನಿರ್ವಹಣೆಯನ್ನು ಆಧುನೀಕರಿಸುವ ಉದ್ದೇಶದಿಂದ ಹಾಗೂ ವೇತನ ನಿರ್ವಹಣೆ ವ್ಯವಸ್ಥೆಯನ್ನು ಸುಧಾರಿಸಲು ಮಾನವ ಸಂಪನ್ಮೂಲ ನಿರ್ವಹಣೆಯ ತಂತ್ರಾಂಶವನ್ನು (Human Resource Management System) ಅಳವಡಿಸಲು ಕ್ರಮ ಕೈಗೊಳ್ಳಲಾಗುತ್ತಿದೆ. HRMS ಒಂದು ಸಮಗ್ರ ಡಿಜಿಟಲ್ ವ್ಯವಸ್ಥೆಯಾಗಿದ್ದು, ನೌಕರರ ಸೇವಾ ದಾಖಲೆ, ಹಾಜರಾತಿ, ವೇತನ ಪ್ರಕ್ರಿಯೆ, ಬಡ್ತಿ, ವರ್ಗಾವಣೆ, ರಜೆ ನಿರ್ವಹಣೆ, ನಿವೃತ್ತಿ ಪ್ರಯೋಜನಗಳು ಹಾಗೂ ಇತರ ಆಡಳಿತಾತ್ಮಕ ಕಾರ್ಯಗಳನ್ನು ಏಕೀಕೃತವಾಗಿ ನಿರ್ವಹಿಸಲು ನೆರವಾಗುತ್ತದೆ. ಈ ವ್ಯವಸ್ಥೆಯ ಮೂಲಕ ನೌಕರರ ಮಾಹಿತಿಯನ್ನು ಆನ್ಲೈನ್ನಲ್ಲಿ ಸುರಕ್ಷಿತವಾಗಿ ಸಂಗ್ರಹಿಸಬಹುದಾಗಿದ್ದು, ಅಗತ್ಯ ಮಾಹಿತಿಯನ್ನು ತಕ್ಷಣ ಪಡೆಯಲು ಸಾಧ್ಯವಾಗುತ್ತದೆ. ಇದರಿಂದ ಆಡಳಿತಾತ್ಮಕ ಕಾರ್ಯಗಳಲ್ಲಿ ಪಾರದರ್ಶಕತೆ ಹೆಚ್ಚುವುದು, ಸಮಯ ಉಳಿಯುವುದು ಮತ್ತು ಕಚೇರಿ ಕಾರ್ಯಪದ್ಧತಿ ಸುಗಮವಾಗುತ್ತದೆ. HRMS ವ್ಯವಸ್ಥೆಯು ನೌಕರರು ಹಾಗೂ ಆಡಳಿತದ ನಡುವೆ ಉತ್ತಮ ಸಂವಹನ ಮತ್ತು ಸೇವಾ ಸುಧಾರಣೆಗೆ ಮಹತ್ವದ ಸಾಧನವಾಗಿದೆ. Payroll ವ್ಯವಸ್ಥೆಯ ಮೂಲಕ ನೌಕರರ ಮಾಸಿಕ ವೇತನ ಲೆಕ್ಕಾಚಾರ, ಭತ್ಯೆಗಳು, ಕಡಿತಗಳು, ತೆರಿಗೆ ಲೆಕ್ಕಾಚಾರ, ಪಿಎಫ್, ಹಾಗೂ ಇತರೆ ಹಣಕಾಸು ವ್ಯವಹಾರಗಳನ್ನು ಸ್ವಯಂಚಾಲಿತವಾಗಿ ಸಂಸ್ಕರಿಸಲಾಗುತ್ತದೆ. ಇದರಿಂದ ವೇತನ ಪಾವತಿ ಪ್ರಕ್ರಿಯೆ ವೇಗವಾಗಿ, ಪಾರದರ್ಶಕವಾಗಿ ಮತ್ತು ದೋಷರಹಿತವಾಗಿ ನಡೆಯಲು ಸಾಧ್ಯವಾಗುತ್ತದೆ. ಸದರಿ ತಂತ್ರಾಂಶದ ಅಳವಡಿಕೆಯು ನೌಕರರ ದೀರ್ಘಕಾಲದ ಬೇಡಿಕೆಯನ್ನು ಈಡೇರಿಸುವತ್ತ ಒಂದು ಮಹತ್ವದ ಹೆಜ್ಜೆಯಾಗಿದೆ. 2. ಕಾನೂನು ಪ್ರಕರಣಗಳ ನಿರ್ವಹಣಾ ತಂತ್ರಾಂಶ - ನ್ಯಾಯಪಥ ದೇಶದ ಸಾರಿಗೆ ಸಂಸ್ಥೆಗಳಲ್ಲೆ ಪ್ರಪ್ರಥಮ ಬಾರಿಗೆ ವಾಯವ್ಯ ಕರ್ನಾಟಕ ರಸ್ತೆ ಸಾರಿಗೆ ಸಂಸ್ಥೆಯಲ್ಲಿ ನ್ಯಾಯಾಲಯದ ಪ್ರಕರಣಗಳ ಸಮರ್ಪಕ ನಿರ್ವಹಣೆ, ಪಾರದರ್ಶಕತೆ ಹಾಗೂ ಕಡಿಮೆ ಸಮಯದಲ್ಲಿ ಆನ್‌ಲೈನ್ ಮುಖಾಂತರ ಮಾಹಿತಿ ಸಂಗ್ರಹಣೆ ಹಾಗೂ ಪ್ರಕರಣಗಳ ವೀಕ್ಷಣೆಗೆ ಮತ್ತು ವ್ಯವಸ್ಥಿತವಾಗಿ ಪ್ರಕರಣಗಳನ್ನು ದಾಖಲಿಸಲು ವಿಶೇಷ ಕೇಸ್ ಮ್ಯಾನೇಜ್ಮೆಂಟ್ ಸಾಫ್ಟ್ ವೇರ್‌ ಅಭಿವೃದ್ಧಿಪಡಿಸಲಾಗಿದೆ. ಈ ತಂತ್ರಾಂಶದ ಮೂಲಕ ಸಂಸ್ಥೆಗೆ ಸಂಬಂಧಿಸಿದಂತೆ ಕೆಳ ಹಂತದ ನ್ಯಾಯಾಲಯದಿಂದ ಸರ್ವೋಚ್ಚ ನ್ಯಾಯಾಲಯದವರೆಗೆ ದಾಖಲಾದ ಎಲ್ಲಾ ಪ್ರಕರಣಗಳನ್ನು ಪರಿಣಾಮಕಾರಿಯಾಗಿ ಟ್ರ್ಯಾಕ್ ಮಾಡಲು, ದಿನಾಂಕವಾರು ಹಾಗು ಪ್ರತಿದಿನದ ಪ್ರಗತಿ ಪರಿಶೀಲಿಸಲು, ಆದೇಶಗಳ ಅನುಸರಣೆ ಹಾಗೂ ನ್ಯಾಯಾಲಯದ ಆದೇಶಗಳನ್ನು ತ್ವರಿತವಾಗಿ ಅನುಷ್ಠಾನಗೊಳಿಸಲು ಕ್ರಮಕೈಗೊಳ್ಳಬಹುದಾಗಿರುತ್ತದೆ. ಇದರಿಂದ ಸಂಸ್ಥೆಯ ನೌಕರರಿಗೂ ಹಾಗೂ ಅಪಘಾತ ಸಂತ್ರಸ್ಥರಿಗೂ ತ್ವರಿತ ಪರಿಹಾರ ನೀಡಲು ಸಾಧ್ಯವಾಗುತ್ತದೆ ಮತ್ತು ಸಂಸ್ಥೆಯ ಅಭಿವೃದ್ದಿಗೆ ಸಹಾಯವಾಗುತ್ತದೆ. ಇದರಿಂದ ಸಿಬ್ಬಂದಿಗಳ ಕಾರ್ಯಕ್ಷಮತೆ ಹೆಚ್ಚಳವಾಗಲಿದ್ದು, ಸಮಯ ಮತ್ತು ಸಂಪನ್ಮೂಲಗಳ ಸಮರ್ಪಕ ಬಳಕೆ ಸಾಧ್ಯವಾಗುತ್ತದೆ. #nwkrtc #hrms #hrmssoftware #legalsoftware #legalcase #foundationday