وحشتيني - عمرو حسن

وحشتيني…. ولو كل اللي عارفينك قالولك إني منفعكيش ولو كل اللي عارفيني قالولي بكره تنسيني وحشتيني…. ولو كل البشر قالوا إن أنا عاصي ده… ده واد تلفان .. كل يومين معاه واحدة وحتى فلان زعل وياه علشان واحدة أنا أصلًا مانيش يوسف ولو زوجة العزيز همت وقالت: هيت ليك ياجميل يجوز راح أميل وممكن أضمها جهرًا يسيل من ضحكها نهرًا تدوب الأغنيات في النيل لكن مهما هشوف وهطوف ومهما قابلت ناس وظروف هتبقي لوحدك القشة اللي جت علشان تنجيني وحشتيني…. وحشتيني…. مفيش إنسان مالوش ماضي مفيش راجل مالوش أخطاء لكن دايمًا في نقطة ضعف ونقطة ضعفي .. هي إنتي طول الوقت كنت بقول أنا مبقتش عاوز شئ سواكي إنتي بحس معاكي إني مسيح براءتك عاملة زي الريح .. بتكنس في الغلط بهدوء ببقى في ضحكتك سكران .. مش عارف لا أنام ولا أفوق كان فيه حل والله… كان ممكن أكون بالوقت زوج صالح ماليش ف المسئولية ساعات ساعات طايش لكن بالوقت كان ممكن أكون أحسن تسامحيني في غلط فالت وهاحلفلك بإني هاصلّح العدلة التي مالت بلاش تمثيل عشان أصلًا صياعتي وفشلي من غيرهم ماكانش يجوز تحبيني وحشتيني…. وحشتيني…. في كل مكان ف ذكرى معاكي متسابه إيديا ف إيدك الطفلة باعدي معاكي للشارع ملامحك وإنتي بتسمعي فيروز نهارك وانتي بتواجهيه بشاى بحليب وحكاياتك على صحابك فلانة بتكرهك جدًا… فلانة قالتلي ماتشوفيهوش كلام قولتيه وكان لازم في وقت الجرح ماتقوليهوش أكيد دلوقتي بتقولي: زمانه مولع الدنيا بيغلط كل يوم عادي خلاص فاكك بقا ومرتاح وأنا والله في قيودك كطير من كتر ما اتقيد طلعله جناح… أنا… أنا في البعد متحاوط بطيف ريحتك أنا في البعد متحاوط بطيف ريحتك ولسه لحد هذا الوقت فاكر شكل تسريحتك وتنهيدك… وشكل الساعة علي إيدك طريقتك وإنتي بتغني بعيد عنك حياتي عذاب حياتك إيه بعيد عني؟ يا أرض عرفتها فجأة ودنيا لمستها بشويش يا أطهر من رقم فلكي .. في عداد إسمه أكل العيش بتحكمي ليه على غيابي .. وفي حضوري بتنسيني رفضتي إن إنتي تتسابي .. وفجأة إنتي اللي سيبتيني وحشتيني…. كإنك… كإنك في الغياب أقرب وجود بيزيد إذا بعدتي رصيد ناقص ف كل غياب .. ووحدك ف الغياب زدتي عرفتي ازاي…ـ عرفتي ازاي تشاركيني غنا التفاصيل بقيت متساب لكن شبطان شيطان طيفك ملاك ف شيطان مخليني ف وسط الناس لكن وحدي أشوف العمر بيعدي وحسديني البشر على إيه وأنا بدونك وإيه الدنيا سوى عيونك؟ سوا حضنك ف وقت الخوف؟ يا عم الحاسد الطامع… تعالي وشوف طلل راجل ف عز الليل… بيسرد قصته لروحه ويشكي جروحه لي جروحه ويظهر للبشر باسم يعيش وكأنه مطمن وهو في قلبه عجيب شوفيلك حل ف غيابك يا إما رجوع من المبدأ يا إما تقولي كيف أبدأ… في أي طريق ينسيني… وحشتيني….