Yardımlı rayonu Dəlləkli kəndi Şəhidimiz Zahid Azad oğlu Zairli.

Yardımlı rayonu Dəlləkli kəndi Şəhidimiz Zahid Azad oğlu Zairli. 10 May 2026-cı il tarixində “Vətən Sevənlər” Şəhid ailələrinə və müharibə iştirakçılarına dəstək İctimai Birliyi-nin sədri, İdarə heyəti və üzvləri işğal altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin və Cəbrayılın azadlığı uğrunda gedən döyüşlərdə qəhrəmancasına savaşaraq şəhid olmuş snayperçi Zahid Zairlinin ev muzeyini və məzarını ziyarət etmişdirlər. VSİB-nin kollektivi şəhid anası və atasına töhfə olaraq öz vətənpərvər fikirlərini bildirərək Birliyin adından fəxri diplom təqdim edərək şəhid Zahid Zairlinin xatirələrini yad etmişdirlər. Vətən müharibəsində qəhrəmancasına döyüşüb şəhidlik zirvəsinə yüksələn əsgərlərimizdən biri də 20 yaşlı Zahiddir. Zahid Azad oğlu Zairli 10 may 2000-ci ildə Yardımlı rayonunun Dəlləkli kəndində anadan olub. Dəlləkli kənd tam orta məktəbini bitirən Zahid 2015-2019-cu illərdə Azərbaycan Memarlıq və İnşaat Universitetinin (AzMİU) nəzdində İnşaat Kollecində təhsil alıb. Təhsilini bitirdikdən sonra, 2019-cu ildə hərbi xidmətə gedib. Zahid əsgərlər arasında keçirilən seçim müsabiqələrini müvəffəqiyyətlə tamamlayıb və XTQ-yə seçilən 25 əsgərdən biri olub. Arzusunda olduğu snayper kimi təlimlərə qatılıb. Sentyabrın 27-də Vətən müharibəsi başlayan andan ön cəbhədə düşmənlə üz-üzə vuruşub. Döyüşlərdə fəal iştirak etdiyinə görə yoldaşları arasında “Canavar” ləqəbi ilə tanınıb. Vətən müharibəsi zamanı Murovdağ, Suqovuşan, Füzuli, Cəbrayıl, Hadrut uğrunda gedən döyüşlərdə iştirak edib. Zahid Zairli oktyabrın 7-də Cəbrayıl rayonu uğrunda gedən döyüşlərdə yaralı yoldaşlarını xilas edərkən ürəyindən snayperlə vurularaq şəhid olub. Yardımlı rayonunda dəfn edilib. Azərbaycan Respublikası Silahlı Qüvvələrinin Ali Baş Komandanı, Prezident İlham Əliyevin müvafiq sərancamı ilə şəhid Zahid Zairli “Vətən müharibəsi iştirakçısı'”, “Cəsur döyüşçü”, "Füzulinin azad olunmasına görə" və "Kəlbəcərin azad olunmasına görə" medalları ilə təltif olunub. Daha sonra Birliyin kollektivi həmin kəndin Birinci Qarabağ müharibəsinin şəhidi Ziyadov Famil Kamil oğlunun məzarını ziyarət ediblər .Tədbirdə kənd sakinləri iştirak etdilər. Çıxışlar zamanı şəhid Ziyadov Familin keçdiyi döyüş yolu və göstərdiyi qəhrəmanlıq haqqında ətraflı məlumat verilib. Şəhid Ziyadov Famil Kamil oğlu 25 yanvar 1976-cı ildə Yardımlı rayonunun Dəlləkli kəndində anadan olub. 17 iyun 1995-ci ildə Vətən uğrunda gedən döyüşlərdə qəhrəmancasına şəhid olub. Şəhidlərimizə Allahdan rəhmət diləyir, yaxınlarına dərin hüznlə başsağlığı veririk...