Şəhid Teymur Rəsulovun (Turan) dəfn mərasimi...Sahil qəsəbəsinin 3-cü şəhidi...21.10.2020-ci il...

#Şəhid #Qarabağ #Vətən... Şəhid Teymur Yavuz oğlu Rəsulov 23 Mart 1988-ci ildə Bakı şəhərində dünyaya göz açmışdır. 1994-cü ildə Sahil qəsəbəsində yerləşən 228 saylı orta məktəbin 1-ci sinfinə daxil olmuşdur. 2000-ci ildən etibarən təhsilini Bakı şəhərində fəaliyyət göstərən Həbib bəy Mahmudbəyov adına Texniki-humanitar kollecdə davam etdirmişdir. 2005-2009-cu illərdə ADNSU-nun “Energetika və Elektroenergetika” fakültəsində təhsil almışdır. 2009-2010-cu illərdə Tərtərdə yerləşən “N” saylı hərbi hissədə birillik həqiqi hərbi xidmət borcunu yerinə yetirmuşdir. 2010-cu ildən etibarən ölkəmizin müxtəlif istehsalat müəssisələrində sahəsi üzrə fəaliyyət göstərmişdir. 2014-cü ildən etibarən “Norm” şirkətində Planlama və dövri təmir üzrə İnspektor, 2018-ci ildən etibarən Qaldırıcı qurğular üzrə Mühəndis vəzifəsində çalışmışdır. 2020-ci ilin 15 İyun tarixində Milli Qəhrəman General-mayor Polad Həşimovun şəhid olduğu gün könüllü olaraq orduya müraciət etmişdir. 2020-ci ilin 27 Sentyabr tarixi İkinci Qarabağ müharibəsinin başlandığı gün qeydiyyata olduğu Qaradağ Rayon Hərbi Komissarlığına yenidən könüllü müraciət etmişdir. Teymurun başqa xüsusiyyəti ədəbiyyata olan marağı və sevgisi idi. "Turan" təxəllüsüylə şeirlər, esselər, məqalələr yazırdı. Müharibənin ilk günü geri qaytarılır. Onunla birlikdə komissarlığa gələn atasını və dostunu evə yola salıb, Şəhidlər Xiyabanına gedir. Orada son yazısını yazıb, Facebook hesabında paylaşır. Yazının bir hissəsində Teymur şəhidlərə müraciətlə deyir: “Sizin öz arzularınıza, mənim isə sizə qovuşacağım gün gəlib, yetişdi”. 29 Sentyabr tarixində orduya cəlb olunur. Yola düşərkən telefonunu dostuna verib, deyir: “Mən gedirəm. Telefonda gələcəyə dair hər şeyi yazmışam. İki cəbhə var. Aramızda bölüşək, birində mən döyüşüm, digərində sən. Ailə sənə əmanətdir”. Teymur Füzulinin, Cəbrayılın, Xocavəndin azad olunması uğrunda gedən döyüşlərdə iştirak edib. 18 Oktyabr 2020-ci il tarixində keçmiş Xocavənd-Hadrut-Şuşa yolunun üzərində gedən döyüşdə döyüş yoldaşı Şəhid Ülvi Hacıyevlə birlikdə qəhrəmancasına döyüşərək şəhid olmuşdur. 21 Oktyabr 2020-ci il tarixində Qaradağ Rayon Lökbatan qəsəbəsində yerləşən Şəhidlər Xiyabanında dəfn olunmuşdur. Şəhid Teymur Rəsulov ölümündən sonra Azərbaycan Respublikasının prezidenti, Ali Baş Komandan cənab İlham Əliyevin müxtəlif sərəncamlarıyla “Vətən uğrunda”, “Füzulinin azad olunmasına görə”, “Xocavəndin azad olunmasına görə” medallarıyla, 3-cü dərəcəli “Vətənə xidmətə görə” ordeniylə təltif olunmuşdur. Son sözü: Döyüşdən öncə irəlilədikləri yolun üzərində istirahət edərkən aclıqdan, susuzluqdan, yorğunluqdan şikayətlənən döyüş yoldaşına belə deyib: “Onsuz da on-on beş il sonra ya sağalmaz xəstəlikdən, ya da avtomobil qəzasında öləcəyik. Şəhid olmaq ən gözəlidir. Şəhidlik bütün ölüm səbəblərindən üstün, yeganə əbədi yaşamaq yoludur”. Son arzusu: Şuşanın azadlığını görmək idi... Xatirəsinə sevgi və ehtiramla!