Պատրիարք Սրբազան Հօր Պատգամը՝ Յովակիմ Աբղ. Սերովբեանի անդրանիկ Ս. Պատարագի առիթով - 29.12.2020

"Հունձքը առատ է, սակայն մշակները սակաւ" Սահակ Բ. Պատրիարք Հայրը իր հայրական պատգամը փոխանցեց Հոգեշնորհ Յովակիմ Աբեղայ Սերովբեանի ըսելով' «Երբ Տէր Յիսուս Քրիստոս արքայութեան աւետարանը քարոզելու համար քաղաքներ ու գիւղեր կը շրջէր, իրեն հետեւող բազմութիւններուն գթաց, անոնց համար տխրեցաւ։ Որովհետեւ ճամբան կորսնցուցած, ցրուած, հովիւ չունեցող ոչխարներուն կը նմանէին։ Այն ատեն իր աշակերտներուն ըսաւ. "Հունձքը ի՛րապէս շատ է, բայց գործաւորները՝ քիչ'. ուրեմն աղերսեցէ՛ք հունձքին Տէրոջ, որ գործաւորներ ուղարկէ իր հունձքին"։ Տէր Յիսուս միայն 12 չէ այլ 72 աշակերտներ հասցուց, անոնք ազգերու եւ ժողովուրդներու ուղարկեց որպէսզի առաքելութիւն կատարեն, մարդոց միտքերը եւ հոգիները մշակեն։ Եկեղեցականը Աստուծոյ եւ իր ժողովուրդին միջեւ միջնորդ մըն է, դուն պիտի զարգանաս եւ պիտի սորվեցնես։ Քու գործդ ձեւաւորել պիտի ըլլայ, ինչպէս Տէր Յիսուս ըրաւ։ Այսօր նաեւ Որոտման Որդիներու, Ս. Յակոբոս եւ Ս. Յովհաննէս Առաքեալներու յիշատակութեան օրն է։ Անոնք անտաշ եւ խիստ եղբայրներ էին, Տէր Յիսուս անոնք փոխեց, նուիրեալ առաքեալներու վերածեց։ Դուն ալ արտօնէ որ Տէր Յիսուս քեզի առաքեալ դարձնէ։ Կ'աղօթեմ, անոնց օրհնութիւնը քու վրադ թող ըլլայ։ Բարի եկար Հայր Սուրբ մեր եկեղեցական դասին, Աստուած ուժդ աւելցնէ, քեզի հաստատ պահէ եւ օրհնէ բոլոր քայլերդ եւ մնաս մշակ առանց ամօթի»: Ս. Որդւոց Որոտման Եկեղեցի, Գումգաբու 29 Դեկտեմբեր 2020