Report TV - Kukës, shtyhet për nesër gjyqi për 23 protestuesit e arrestuar, flet kancelari

Pas akteve të dhunës në “Rrugën e Kombit” kundër vendosjes së taksës për automjetet, 23 protestuesit e arrestuar priteshin të dilnin sot përpara Gjykatës së Kukësit për t’u njohur me masën e sigurisë. Por burime për Report TV bëjnë të ditur se Gjykata do ta vlerësojë nesër nëse janë të ligjshëm ose jo urdhërarrestet e Prokurorisë ndja tyre. Kjo shtyrje bëhet për shkak të dosjeve voluminoze. Pjesa më e madhe e protestuesve, 13 prej tyre ndodhen në Drejtorinë e Policisë në Tiranë, ndërsa pjesa tjetër, 10 protestues në komisariatin e Policisë së Kukësit. Mbi protestuesit rëndojnë katër akuza, ajo e tubimit të paligjshëm, dhunë dhe kundërshtim ndaj policisë si dhe shkatërrim të pronës publike. Report TV ka mësuar sot se Prokuroria pritet që ta ndryshojë kërkesën e masës për ta nga “urdhër ndalimi”, në “hetim në gjendje të lirë”. Do të jetë gjyqtarja Alma Ahmeti ajo që do të vlerësojë masën e sigurisë.