ရခိုင်နဲ့ချင်း တပ်ဖွဲ့တွေကို အမေရိကန်က ကူဖို့ လုပ်နေတယ် ဆိုတာ အမှန်လား - BBC News မြန်မာ

တရုတ်က စစ်ကောင်စီကို ပြတ်ပြတ်သားသား ကျောထောက် နောက်ခံမှု ပေးနေပြီး၊ မြောက်ပိုင်း အဖွဲ့တွေ အပေါ် ဖိအား အပြင်းအထန်ပေးလို့ လားရှိုးမြို့ပေါ်ကို စစ်ကောင်စီ အုပ်ချုပ်ရေး အောက် ပြန်လွှဲစေတာမျိုးထိ ပြုလုပ်လာပါတယ်။ အုပ်ချုပ်ရေး လွှဲပြောင်းတာ ချောမွေ့ စေဖို့နဲ့ အပစ်ရပ် စောင့်ကြည့်ဖို့ ဆိုပြီး လားရှိုးမှာ ရုံးခန်းဖွင့်တဲ့ အထိ လုပ်ပါတယ်။ တရုတ်ရဲ့ အကျိုးစီးပွားတွေကို ကာကွယ်ဖို့ ဆိုပြီး တရုတ်ပုဂ္ဂလိက လုံခြုံရေး ကုမ္ပဏီတွေကို မြန်မာနိုင်ငံထဲ နေရာချ လှုပ်ရှားခွင့်ပေးထားသလို၊ စစ်ကောင်စီနဲ့ ပူးတွဲပြီးတော့လည်း လုံခြုံရေး အဖွဲ့ ထူထောင်မယ့် အစီအစဥ် တရားဝင် ထုတ်ပြန်ထားပြီး ဖြစ်ပါတယ်။ ဒီအချိန်မှာပဲ အမေရိကန်နဲ့ အနောက်အုပ်စု နိုင်ငံတွေကလည်း မြန်မာနိုင်ငံ ပြည်တွင်းစစ်ထဲ စစ်ရေးအရပါ တိတ်တဆိတ် ပါဝင် ပတ်သက်တာမျိုး ရှိလာနေတယ် ဆိုပြီး သတင်းတွေ ထွက်လာပါတယ်။ အဓိကကတော့ အိန္ဒိယ သတင်းဌာနတချို့က ရေးကြတာ ဖြစ်ပါတယ်။ ဒီရက်ပိုင်း အိန္ဒိယ မီဒီယာတွေ အာရုံစိုက် ပြောနေတဲ့ အချက် ၂ ချက် ရှိပါတယ်။ ပထမ အချက်ကတော့ အနောက်နိုင်ငံသား ကြေးစား စစ်သား အများအပြားဟာ ချင်းတော်လှန်ရေး တပ်ဖွဲ့တွေနဲ့ အတူ ရှိနေပြီး ကူညီ တိုက်ခိုက်ပေးနေတယ် ဆိုတဲ့ အချက် ဖြစ်ပါတယ်။ ဒုတိယ ကတော့ အမေရိကန်နဲ့ ဘင်္ဂလားဒေ့ရှ်တို့ ပူးပေါင်းလို့ ရခိုင်နဲ့ ချင်း တိုင်းရင်းသား တော်လှန်ရေး အဖွဲ့တွေကို ကူညီဖို့ လုပ်နေတယ် ဆိုတဲ့ အပြောမျိုး ဖြစ်ပါတယ်။ အခုအချိန်ဟာ ကုလသမဂ္ဂ အတွင်းရေးမှူးချုပ် အန်တိုနီယို ဂူတားရက်စ် အကြံပြုထားသလို ရခိုင်မြောက်ပိုင်း အထိ စာနာမှု အကူအညီတွေ ပေးနိုင်တဲ့ လမ်းကြောင်း ဘင်္ဂလားဒေ့ရှ်ထဲကနေ ဖွင့်နိုင်မလား ဆိုတဲ့ အပေါ် ဆွေးနွေး ချိန်ဆ နေကြတဲ့ အချိန်ဖြစ်ပါတယ်။ ဒီတော့ အခုလို စစ်ရေး ထောက်ပံ့မှုတွေ လုပ်ဖို့ နောက်ကွယ် အကြံအစည်တွေ ရှိနေတယ် ဆိုတဲ့ အပြောမျိုးဟာ “စာနာမှု လမ်းကြောင်း” အကောင်အထည် ဖော်နိုင်ဖို့ကိုပါ ထိခိုက်သွားစေနိုင်ပါတယ်။ ဒီတစ်ပတ်မှာတော့ ချင်း တပ်ဖွဲ့တွေနဲ့ အတူ ကူညီ တိုက်ခိုက်ပေးနေတဲ့ အနောက်နိုင်ငံသား ကြေးစား စစ်သားတွေ ရှိနေတယ် ဆိုတဲ့ ပြောဆိုမှုနဲ့ ရခိုင်နဲ့ ချင်း တော်လှန်ရေး အဖွဲ့တွေကို ကူဖို့ အမေရိကန်နဲ့ ဘင်္ဂလားဒေ့ရှ် ပူးပေါင်း ကြံစည်နေတယ် ဆိုတာ ဘယ်လောက် မှန်ကန် နိုင်သလဲ ... မြန်မာနိုင်ငံ ပြည်တွင်းစစ်ဟာ တရုတ်နဲ့ အမေရိကန်တို့ရဲ့ ကြားခံ ပရောက်ဇီ စစ် အသွင် ဖြစ်လာနေလား .... စတာတွေ အပေါ် ကျယ်ကျယ်ပြန့်ပြန့် ဆွေးနွေးသွားမှာ ဖြစ်ပါတယ်။ ဒီတစ်ပတ် ပါဝင် ဆွေးနွေးကြသူတွေကတော့ အိန္ဒိယအခြေစိုက် ဝါရင့် သတင်းထောက်တစ်ယောက် ဖြစ်ပြီး၊ မြန်မာ့ အရေး သုံးသပ်ချက် ဆောင်းပါးတွေ ရေးသားနေတဲ့ ဆူဘီးရ် ဘိုးမစ်နဲ့ အမေရိကန် ကာကွယ်ရေး ဝန်ကြီးဌာန၊ National War Colleage က လုံခြုံရေးဆိုင်ရာ မဟာဗျူဟာ ဘာသာရပ်ရဲ့ ပါမောက္ခ ဒေါက်တာ ဇါခရီ အဘူဇာ တို့ ဖြစ်ပါတယ်။ ဘီဘီစီ သတင်းထောက် ကိုဝေဖြိုး စီစဥ် တင်ဆက်ထားတာကို မေလ ၃ ရက်၊ စနေည မြန်မာစံတော်ချိန် ည ၈ နာရီမှာ ဘီဘီစီမြန်မာပိုင်းရဲ့ ဖေ့စ်ဘုတ်စာမျက်နှာနဲ့ ည ၈ နာရီ ခွဲ အချိန် ဘီဘီစီမြန်မာပိုင်းရဲ့ ယူကျုချန်နယ်တို့ကနေ ထုတ်လွှင့်သွားမှာမို့ စောင့်မျှော် ကြည့်ရှုနိုင်ကြပါတယ်။ #ဘီဘီစီမြန်မာပိုင်း #သတင်းမြင်ကွင်း