CHADEMA YAKANA KUANDAA MAANDAMANO YA JULY 7 || CCM WASEMA HAKUNA MAANDAMANO

CHADEMA YAKANA KUANDAA MAANDAMANO YA JULY 7 || CCM WASEMA HAKUNA MAANDAMANO   Viongozi wa vyama vya siasa Mkoa wa Mbeya wahimiza wananchi na wafuasi vya vyama vya siasa mkoani humo kudumisha Amani, Utulivu na Mshikamano. Hayo yamesemwa Julai 06, 2026 na viongozi hao katika kikao kilichohusisha Viongozi wa Jeshi la Polisi Mkoa wa Mbeya wakiongozwa na Kamanda wa Polisi Mkoa wa Mbeya, Kamishna Msaidizi Mwandamizi wa Polisi SACP Benjamin Kuzaga na viongozi wa vyama vya siasa mkoani humo huku ajenda ikiwa ni Amani na Utulivu. Katibu wa Chama cha Demokrasia na Maendeleo (CHADEMA) Mkoa wa Mbeya Hamadi Mbeyale amesema kuwa chama hicho hakijaratibu wala kuandaa maandamano na kusisitiza wana Mbeya kuendelea kuwa watulivu na kudumisha Amani na Utulivu. Kwa upande wake, Katibu wa CCM Mkoa wa Mbeya, Langael Akyoo amesema kuwa wao kama viongozi wa vyama vya siasa wamekubaliana kwa kauli moja kuwa hakuna maandamano na kuwataka wananchi kuendelea na shughuli zao, kazi na biashara zao bila wasi wasi wowote. Naye, Mwenyekiti wa CHAUMA Mkoa wa Mbeya, Ipyana Samson amewataka viongozi wenzake kwenda kuwa mabalozi wa amani na utulivu kwa wafuasi wao na wananchi kwa ujumla na kukemea vitendo visivyofaa ikiwemo vurugu na maandamano yasiyofuata sheria.   Jeshi la Polisi Mkoa wa Mbeya limeendelea kuimarisha ulinzi na usalama wa raia na mali zao huku likisisitiza na kuwataka wananchi kuendelea kudumisha amani, kutoa taarifa za viashiria vya uhalifu na wahalifu ili hatua za kisheria ziweze kuchukuliwa dhidi yao.