Abdullah Jamal Sagirma performs Camille Saint Saens Danse Macabre

خوشک و برایانی خۆشەویست خۆشحاڵم کە بەرهەمێکی دیکەتان پێشکەش دەکەم. هیوادارم بتوانم بۆ ئەو چەند خولەکەی کاتی بەرهەمەکە، کەمێک دڵ و گیانتان ئارام بکەم. ناونیشانی کارەکە، سەمای مردووان (Macabre Dance)ە کە پارچەیەک موزیکی ئۆرکسترایە و موزیک دانەری فەڕەنسی کامیل سەن سانس (Camille Saint-Saëns) لە ساڵی ١٨٧٤دا بە پێی ئەفسانەیەکی فەڕەنسیی دایناوە. لە سەرەتادا، سەن سانس پارچە موزیکەکەی وەک گۆرانییەک بۆ دەنگ و پیانۆ داناوە کە شاعیرێکی فەڕەنسیی بە ناوی هێنری کازالیس (Henri Cazalis) وشەکانی بۆ گۆرانییەکە نوسیوە. پاشان ڤێرژنێکی نوێی لێ دروستکردووە، بەشی دەنگەکەی بۆ ئامێری ڤایۆلین و بەشی پیانۆکەی بۆ ئۆرکسترا گۆڕیوە. لە نزیکەی ٢٠ ساڵ لەمەوبەرەوە ئەم پارچەیەم ژەنیوە، هەر لە سەرەتاوە هەتا ئەمڕۆ حەزم لێی بووە و سەدان جار گوێم لە تومارکراوە جیاوازەکانی گرتووە کە ژەنیاری زۆر بە توانا و بەناوبانگ لەسەر ئاستی دنیا ژەنیویانە. میلۆدییەکان و ڕیتمەکان و تەلاری پارچەکە گەلێک چالاک و توندتۆڵن، بە شێوازێکی زۆر ئاست بەرز داڕێژراون و درامایەکی موزیکیی نایاب و بێ وێنەیان لێ دروستکراوە. هەرچەندە چەندین موزیک دانەری دی کارەکەیان بۆ هەر دوو ئامێری ڤایۆلین و پیانۆ ئەڕێنج کردووە، بەڵام لە ڕاستییدا من جارێکی دی ئەڕێنجم کردووەتەوە، گەلێک گۆڕانکاریم لە بەشی پیانۆکەدا کردووە و پێم وایە کەمێک زیاتر لەگەڵ حەز و ئارەزووی خۆمدا گونجاندوومە. بێ گومان، من بە هیچ جۆرێک باوەڕم بە ئەفسانەی پارچەکە نییە، بەڵام لەوانەیە شتێکی باش بێت، گەر بیسەری کورد و خوێندکارەکانم بە تایبەتیی، کەمێک زانیاریشیان دەربارەی ئەفسانەکە هەبێت. چیرۆکی ئەفسانەکە دەڵێت: فریشتەی مەرگ ساڵی جارێک، لە جەژنی هالوین (Halloween) و لە کاتژمێر ١٢ی شەو بۆ سەر زەوی دادەبەزێت. ئامێڕی ڤایۆلین بۆ مردووان دەژەنێت، داوایان لێ دەکات لە گۆڕەکانیان هەستنەوە و پێکەوە هەتا بەیانی سەما بکەن. موزیک دانەر سەن سانس، بۆ بەرجەستەکردنی هاتنی فریشتەکە لە کاتژمێر ١٢ی شەودا، ١٢ ترپەی بە تەکنیکی پزیکاتۆی دەستی چەپ لە بەشی ڤایۆلینەکەدا داناوە، هەروەها بۆ دیاریکردنی کۆتایهاتنی سەماکە لە بەیانییدا، شێوەیەک لە خوێندنی کەڵەشێری بە ئامێری ڤایۆلین دروستکردووە. هیوادارم کاتێکی خۆش و بە سودی لەگەڵدا بەرنەسەر و هەر تێبینی و پرسیارێکیشتان هەبوو، من ئامادەم بە چاوانم وەڵامتان بدەمەوە. سوپاس براتان: د. عەبدوڵا جەمال سەگرمە سلێمانی / کوردستان ٢/٣/٢٠١٧