គម្រោង «ដាំស្មៅយក្ស» នៅពោធិ៍សាត់ ជាយុទ្ធសាស្ត្រថ្មីបង្កើនចំណូលសហគមន៍ កាត់បន្ថយការដាក់សម្ពាធលើព្រៃឈើ

គម្រោង «ដាំស្មៅយក្ស» នៅពោធិ៍សាត់ ជាយុទ្ធសាស្ត្រថ្មីបង្កើនចំណូលសហគមន៍ កាត់បន្ថយការដាក់សម្ពាធលើព្រៃឈើ ពោធិ៍សាត់៖ គម្រោង «ដាំស្មៅយក្ស» នឹងត្រូវចាប់ផ្ដើមដំបូងគេនៅខេត្តពោធិ៍សាត់ ក្នុងឆ្នាំ ២០២៦នេះ។ នេះជាយុទ្ធសាស្ត្រថ្មីមួយរបស់ក្រសួងបរិស្ថាន ក្នុងគោលបំណងបង្កើនចំណូលដល់សហគមន៍មូលដ្ឋាន និងកាត់បន្ថយសម្ពាធជ្រុលហួសហេតុលើព្រៃឈើ។ ក្នុងពិធី «ផ្សព្វផ្សាយជំរុញភាពស្អាត និងភាពបៃតង នាសហគមន៍ភូមិភ្នំទំព័រ ស្រុកវាលវែង» កាលពីព្រឹកថ្ងៃទី១៧ ខែកក្កដា លោក ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន បានលើកឡើងថា ក្រសួងបរិស្ថាន កំពុងរៀបចំគម្រោងដាំដុះនេះនៅតាមសហគមន៍តំបន់ការពារធម្មជាតិ ក្នុងភូមិសាស្ត្រខេត្តពោធិ៍សាត់ សម្រាប់ឆ្នាំ២០២៦ នេះ។ គម្រោងនេះ គឺជាយុទ្ធសាស្រ្តថ្មី ក្នុងការបង្កើតមុខរបរថ្មីដល់សហគមន៍ ដើម្បីកុំឱ្យពួកគេចូលព្រៃកាប់ឈើ ឬបរបាញ់សត្វខុសច្បាប់ទៀត។ ការដាំស្មៅយក្សអាចជួយបង្កើតប្រព័ន្ធឫសដ៏រឹងមាំដើម្បីការពារការហូរច្រោះដី រក្សាសំណើម និងបង្កើនគុណភាពដីនៅតំបន់ជុំវិញ។ ក្រៅពីការប្រើប្រាស់ក្នុងសហគមន៍ វាក៏អាចផ្គត់ផ្គង់ជាថាមពលជីវម៉ាស (Biomass) សម្រាប់រោងចក្រ និងវិស័យឧស្សាហកម្ម ដែលចូលរួមចំណែកយ៉ាងសំខាន់ក្នុងការកាត់បន្ថយការបំភាយឧស្ម័នពុល។ លើសពីនេះ ស្មៅយក្សថែមទាំងអាចយកទៅផលិតជា «ធ្យូងជីវៈ» (Biochar) ដែលកំពុងមានការពេញនិយមប្រើប្រាស់ទូទាំងពិភពលោក ដោយសារអត្ថប្រយោជន៍ច្រើនយ៉ាង និងអាចយកទៅច្នៃប្រឌិតបានច្រើនទម្រង់។ ចំពោះបញ្ហាទីផ្សារវិញ អ្នកនាំពាក្យក្រសួងបរិស្ថានរូបនេះបានគូសបញ្ជាក់ថា បច្ចុប្បន្ន ដំណាំស្មៅយក្សគឺមិនមានការព្រួយបារម្ភនោះទេ ពោលគឺមានតម្រូវការទាំងក្នុងស្រុក និងការនាំចេញទៅក្រៅប្រទេស។ ហេតុនេះ អ្វីដែលក្រសួងបរិស្ថានកំពុងខ្នះខ្នែងយកចិត្តទុកដាក់ខ្លាំងនៅពេលនេះ គឺការជួយសម្របសម្រួល និងបណ្តុះបណ្តាលបច្ចេកទេសដាំដុះដល់សហគមន៍ ដើម្បីពង្រឹងសមត្ថភាពផលិតឱ្យទាន់ស្របតាមតម្រូវការទីផ្សារតែប៉ុណ្ណោះ។ លោក ខ្វៃ អាទិត្យា ប្រាប់យ៉ាងដូច្នេះថា៖«ឥឡូវនេះ យើងកំពុងមានតម្រូវការពីក្រុមហ៊ុនចំនួនពីរនៅក្រៅស្រុក ហើយតម្រូវការពីឧស្សាហកម្មក្នុងស្រុកក៏មានដែរ បន្ទាប់ពីយើងជំរុញឱ្យប្រជាសហគមន៍ដាំដុះ។ បច្ចុប្បន្ន អ្នកជំនាញកំពុងសិក្សាលើទីតាំង និងជួយឱ្យពលរដ្ឋមានចំណេះដឹងក្នុងការថែទាំ និងដាំស្មៅនេះឱ្យបានច្រើនឆ្លើយតបនឹងតម្រូវការទីផ្សារ»៕ ដោយ៖ ឈុំ ចន្ថា ផលិតដោយ៖ ថ្មីៗមីឌៀគ្រុប សូមចុចចូលតេឡេក្រាមផ្លូវការរបស់សារព័ត៌មានថ្មីៗមីឌៀគ្រុប t.me/thmeythmeymedia ដើម្បីទទួលបានព័ត៌មានរហ័ស និងសម្បូរបែប! សូមចុចចូលMessengerផ្លូវការរបស់សារព័ត៌មានឌីជីថលថ្មីៗ https://www.messenger.com/channel/Thm... ដើម្បីទទួលបានព័ត៌មានរហ័ស និងសម្បូរបែប! ទំនាក់ទំនងផ្សព្វផ្សាយពាណិជ្ជកម្មជាមួយសារព័ត៌ថ្មីៗមីឌៀគ្រុបតាមរយៈ 012 900 132/081 699 329 ឬតេឡេក្រាម t.me/salesttn ThmeyThmey Media Group: Youtube: https://bit.ly/2RNzknr Instagram: https://bit.ly/32QSFup Twitter: https://bit.ly/3iTsTuS Web: https://bit.ly/3hPEU3q Facebook: https://bit.ly/2FGyvKY Threads: https://bit.ly/44q1UPl © All Rights Reserved & Copyrights by Thmey Thmey Media Group #thmeythmey #thmeythmeynews #cambodianess #thmeythmey25 #ថ្មីៗ