ឆាយាលើអង្គរ ដាប ឈួន ម្ជុល ពេជ្រ

ដាប ឈួន មានកំណើត​នៅ​ខេត្តកំពង់ធំ ឪពុក​ឈ្មោះ គឹម រាល ម្តាយ​ឈ្មោះ យឹម ។ លោក គឹម រាល និង យឹម មានកូន ៧​នាក់៖ គឹម បឿន (ប), គឹម ឈួន (ដាប ឈួន) (ប), គឹម ឈរ (ប), គឹម ស្ដើង (ស), គឹម សោម (ស), គឹម ស្រី (ប), គឹម ពៅ (ស្លាត ពៅ) (ប) ។ ពេល​ដែល​ជប៉ុន​ចាញ់​សង្គ្រាម ទើប​មាន​ដំណោះស្រាយ​បារាំង​-​សៀម ចុះហត្ថលេខា ថ្ងៃ​១៧ វិច្ឆិកា ១៩៤៦ ដោយ​ថៃ​យល់ព្រម​បង្វិល​ទឹកដី​របស់​ខ្មែរ​ខាងលើ មក​ឲ្យ​កម្ពុជា​វិញ ។ លោក គឹម ឈួន ហៅ ដាប ឈួន ជា​ពលបាលត្រី​ទ័ព​ថៃ​តែ​បាន​បោះបង់​តំណែង​នេះ​នៅ​ឆ្នាំ​១៩៤៤ ។ ខ្មែរឥស្សរៈ​មាន​ចំនួន ៣០០​នាក់ បាន​បញ្ចេញ​ឥទ្ធិឫទ្ធិ​លើក​ទី​១ របស់​ខ្លួន​នៅ​ថ្ងៃ​៧ សីហា ១៩៤៦ ដឹកនាំ​ដោយ ដាប ឈួន វាយ​បារាំង​នៅ​ក្រុង​សៀមរាប​-​អង្គរ ។ បន្ត​មក​ទៀត ដោយសារ​ការ​ចរចា ដាប ឈួន បាន​ដាក់អាវុធ ចុះចូល​មករាជរដ្ឋាភិបាល នៅ​ថ្ងៃទី​១ តុលា ១៩៤៨ តែ​គាត់​នៅ​តែ​រក្សា​អំណាច​ដូច​ស្តេចត្រាញ់ ត្រួតត្រា​ទឹកដី​មួយ​ផ្នែក​ធំ​ប៉ែក​ខាងជើង​ប្រទេស ។ នៅ​ឆ្នាំ​១៩៤៩ ស្តេច នរោត្តម សីហនុ បាន​ប្រគល់​តំបន់​យោធា​ស្វ័យត​សៀមរាប​ឲ្យ​គាត់ ។ នៅ​ឆ្នាំ​១៩៥៦ សម្តេច សីហនុ បាន​តែងតាំង ដាប ឈួន ជា​ចៅហ្វាយ​ខេត្ត​សៀមរាប ពេល​នេះ ដាប ឈួន បាន​ឲ្យ​គេ​ហៅ​ខ្លួន​ថា «ឈួន ម្ជុលពេជ្រ» ។ តាម​សៀវភៅ​សម្តេច ន. សីហនុ ១៩៧៣ LA CIA CONTRE LE CAMBODGE ដាប ឈួន ជា​ជន​ក្បត់ជាតិ បាន​ត្រូវ​កូនទាហាន​របស់​ខ្លួន​បាញ់​សម្លាប់ នៅ​ថ្ងៃ​២១ កុម្ភៈ ១៩៥៩ ។ គម្រោង​រួមគំនិត​ក្បត់​នេះ បាន​ត្រូវ​លោក PIERRE GORCE អគ្គរដ្ឋទូត​បារាំង នៅ​ភ្នំពេញ បាន​ថ្វាយ​ដំណឹង​ទៅ​សម្តេច សីហនុ ឲ្យ​ដឹង ។ ពេល​ដែល​ឆែកឆេរ​លំនៅដ្ឋាន មាន​ឃើញ មាស ២៧០ គ.ក្រ. ជា​តម្លៃ​ក្បត់ជាតិ ដែល សេអ៊ីអា បាន​ផ្តល់​ឲ្យ​គាត់ តាម​រយៈ​បុគ្គលិក​ទូត​យួន​ខាងត្បូង​នៅ​ភ្នំពេញ ឈ្មោះ ង៉ោ ទ្រុងហ៊ាវ ។ ប្រពន្ធ​ទី​១ របស់ ដាប ឈួន ឈ្មោះ តាំង អ៊ឹម ដែល ដាប ឈួន ដាក់គុក​ក្នុង​ទ្រុង បាន​ស្លាប់ ១ អាទិត្យ​ក្រោយមក «ដោយសារ​គេ​បំពុល» (តាម​សំដី​ស្តេច​សីហនុ) ៕ ប្រភព ៖ https://choukhmer.wordpress.com/2022/07/15...