ចិត្តខុសពីមុន - សំនៀងដើម អ្នកស្រីហួយ មាស - ច្រៀងឡើងវិញដោយអ្នកស្រី ហៀង ម៉ូលីណា | Chet Khos Pi mun

ប្រវត្តិចម្រៀង ------- ចម្រៀងមួយបទនេះ គឺមាន អ្នកស្រី ហួយ មាស គឺជាម្ចាស់សំនៀងដើម ហើយថែមទាំងជាម្ចាស់នៃសាច់រឿងនៃបទចម្រៀងមួយបទនេះទៀតផង។ ចម្រៀងមួយបទនេះគឺជាចម្រៀងដែលបង្គប់នូវប្រវត្តិស្នេហាប្រេះឆាយ៉ាងប្រទាក់ក្រឡាគ្នារវាង អ្នកស្រី ហួយ មាស និងស្វាមីទី១ របស់លោកស្រី គឺ លោក អ៊ុំ សុផានុរក្ស ហៅ យែល។ នៅពាក់កណ្ដាលទសវត្សរ៍ឆ្នាំ៦០ គឺឆ្នាំ ១៩៦៤ ឬ ១៩៦៥ អ្នកស្រី ហួយ មាស បានបែកបាក់ពី លោក អ៊ុំ សុផានុរក្ស ហៅ យែល ដែលជាស្វាមីទី១ របស់អ្នកស្រី ហើយអ្នកស្រី ក៏បានទៅរួមរស់ជាមួយស្វាមីទី២របស់អ្នកស្រីគឺ លោក វ៉ាន់លី កេសារ៉ូ ប៉ុន្តែ អ្នកស្រី ហួយ មាស និង លោក វ៉ានលី កេសារ៉ូ មិនបានរៀបអាពាហ៍ពិពាហ៍តាមប្រពៃណីនោះទេ។ ការណ៍ដែល អ្នកស្រី ហួយ មាស បានទៅរួមរស់ជាមួយនឹងស្វាមីទី២ គឺបានធ្វើឲ្យ លោក អ៊ុំ សុផានុរក្ស ហៅ យែល ដែលជាស្វាមីទី១ មានការឈឺចាប់ជាខ្លាំង និងបានពឹង កវី ម៉ា ឡៅពី ឲ្យជួយនិពន្ធចម្រៀងមួយបទមានចំណងជើង "សំឡេងទ្រខ្មែរ" ដែលមានអត្ថន័យរៀបរាប់អំពីទុក្ខសោករបស់លោក ហើយថែមទាំងលាយឡំនូវការតិះដៀល អ្នកស្រី ហួយ មាស កប់ៗមាត់ទៀតផង។ បន្ទាប់ពីបានឮស្វាមីទី១ គឺ លោក អ៊ុំ សុផានុរក្ស ច្រៀងដៀលត្មះដូច្នេះ អ្នកស្រី ហួយ មាស ក្ដុកក្ដួល ឆួលងំ ពេញឱរ៉ា ព្រោះថារឿងនេះមិនមែនទះដៃតែម្ខាងទើបឮនោះទេ គឺកំហុសសុទ្ធតែមានរៀងៗខ្លួន គ្រាន់តែ អ្នកស្រី មិនចង់បើកបង្ហាញតែប៉ុណ្ណោះ។ ព្រោះបើបើកកកាយចេញទៅ មិនខុសពីហែកកេរ្ដិ៍ឲ្យគេដឹងឮនោះឡើយ ប៉ុន្តែពេលនោះបើ អ្នកស្រី មិនតបបកស្រាយទៅវិញ គេអាចនឹងចោទថា រឿងនេះគឺជាកំហុសរបស់អ្នកស្រីទាំងស្រុង។ ដូច្នេះដោយចង់បំភ្លឺកុំឲ្យមហាជនចោទតែម្ខាង ពេលនោះ អ្នកស្រី ហួយ មាស បានពឹងកវីដ៏ល្បីម្នាក់គឺ លោក ពៅ ស៊ីផូ ឲ្យជួយនិពន្ធចម្រៀងមួយបទ ដើម្បីឆ្លើយតបទៅវិញ ដែលបទនោះមានចំណងជើងថា "ចិត្តខុសពីមុន" ហើយ អ្នកស្រី បានយកបទនេះទៅច្រៀងផ្សាយតាមវិទ្យុជាតិល្បីកក្រើកផងដែរនៅក្នុងកំឡុងឆ្នាំ ១៩៦៨​​ ឬ ១៩៦៩។ ប៉ុន្តែបទ "ចិត្តខុសពីមុន" ដែលជាបទដើមច្រៀងដោយ អ្នកស្រី ហួយ មាស បានបាត់បង់ទៅហើយ ហើយនៅទសវត្សរ៍ឆ្នាំ៨០ អ្នកស្រី សូ សាវឿន បានយកបទនេះមកច្រៀងសារឡើងវិញ។ បន្ទាប់មក នៅទសវត្សរ៍ឆ្នាំ៩០ អ្នកស្រី ហៀង ម៉ូលីណា ក៏បានយកបទនេះមកច្រៀងឡើងវិញផងដែរ។ --------------- ស្រាវជ្រាវដោយលោក ៖ លោក សេង តារា    • Video   --------------- បទ ៖ សំឡេងទ្រខ្មែរ    • Video