Шетелге жұмыс істеуге бармақ болған қазақстандық студенттер қып-қызыл шығынға батты

Шетелге жұмыс істеуге бармақ болған 100-ден астам қазақстандық студент қып-қызыл шығынға батты. Олар Job2day компаниясын сотқа бермек. Себебі жастардан ақша жинап, Еуропаға жолдама алып, жұмыс орнын тауып беруі керек болған орталық міндетін орындамаған. Ақырында не ақша, не билет жоқ. Енді студенттер полицияға шағымданып, төлемді толық қайтаруды талап етуде. Тақырыпты әріптесім Оразай Нұртайұлы жалғастырады. "Work and Travel" бағдарламасымен шекара асып, шетелде табыс тапқысы келген бұл бір топ студенттің көбі 2-курста оқиды. Келісімшарт бойынша олар қазір Германияда жұмыс істеп алғашқы айлығын да алу керек еді. Бірақ жастарға жолдама мен қызмет орнын тауып береміз деген Job2day компаниясы келісімді орындамай, шетелге тіл үйреніп дайындалғандар босқа кеткен ақшасын қайтара алмай Алматыда жүр. СҰЛТАН МҰХАМЕДЖАН, студент: Договорда жазған 31-ші майға дейін жұмыс офер келу керек еді, бірақ оған дейін келмеді. 31-ші майға дейін келмеген жағдайда 100 пайыз возврат деген болды. Негізі компанияда 160 адамға офер шықпады. Олардың бәріне ақша әлі қайтпады. НҰРАЙ РАХМАНБЕК, студент : Тіпті хабарға да шықпады, звондасақ мүлдем алмайтын телефондарын. Ай сайын 33 мың 334 теңге төлеймін. Енді өзіміздің ақшамыз болмағандықтан бәріміз студентпіз әке-шешеміздің ақшасын аламыз өкінішке орай. Соны қайтарсақ деп едік. Әке-шешеміздің алдында абыроймызды түсірді Job2day осы әрекетімен. Студенттердің айтуынша, жастардың жоспарын құртқан компанияның кесірінен жалпы Қазақстан бойынша 100-ден астам адамның аузы күйген. Шетелде миллиондап айлық аламыз деп ойлап, нар тәуекел етіп жолдама ақысын кредитпен төлегендер де жетерлік. Мекеме студенттерден 500 мың мен 800 мың теңге аралығында ақша алған. Мұны компания директоры да мойындады. МИРАС ОРАЗҒАЛИЕВ, "JOB2DAY" компаниясының атқарушы директоры: Біз биыл халықаралық компания арқылы жұмыс істедік. Олар бізден адам тізімін алып жолдама мен жұмыс орнын тауып беруі керек болған. Бірақ жүгінген азаматтардың аз бөлігі ғана Еуропаға кетті. Қалғаны елде қалып қойды. Біз келісімшарттағы міндеттерден бас тартпаймыз, ақшаны қайтарамыз. Шетелден үміті үзілген студенттер енді ақшаны соңғы тиынына дейін қайтаруды талап етті. Құр уәдеден шаршаған жастар енді мәселені полиция арқылы шешпек. Ол үшін арыз да жазған. Құзырлы органдардың хабарлауынша, бүгінде мән-жайды тексеру жұмыстары басталған. Компанияның әрекетінде заңсыздықтар анықталған жағдайда тиісті шаралар қабылданады. #Информбюро #JOB2DAY #WorkandTravel #шетел #31канал