Qytetarët nga Kosova dyfishojnë prenotimet për pushime në Shqipëri

Saranda tashme është një nga destinacionet më të pëlqyera të qytetarëve kosovarë në rivierën shqiptare, sidomos nga rinia. E pikërisht Saranda me drejtuesit e saj lokalë e me përfaqësues biznesesh prezantuan ofertën turistike për këtë sezon në Prishtinë. Kryetari i këtij qyteti, Adrian Gurma, duke i falënderuar pushuesit kosovarë që e mbajtën gjallë turizmin e Sarandës edhe në kohë COVID-i, i ftoi ata të pushojnë në Sarandë. “Në momentet më të vështira që Saranda dhe gjithë turizmi shqiptar kaloi në pandemi ishin ata që i dhanë frymëmarrje këtij turizmi”, tha Gurma. Ai tregoi se qyteti është gati për të mirëpritur sezonin e ri turistik. “Është shumë i rëndësishëm angazhimi maksimal i bizneseve dhe strukturave të pushtetit lokal, në mënyrë që oferta turistike të jetë e përmirësuar kryesisht në cilësi, por edhe e zgjatur në kohë”, u shpreh kryebashkiaku i Sarandës. Drejtuesit e institucioneve të rëndësishme në Kosovë, kërkuan nga qytetarët e Sarandës që të shkëmbejnë eksperiencat duke vizituar Kosovën. Se Saranda po bëhet atraktive për pushuesit nga Kosova e thotë edhe kryetari i Shoqatës së Transportit Rrugor të Udhëtarëve, Ruzhdi Kurtishja, njëkohësisht pronar i një agjencie turistike. “Saranda është një prej destinacioneve më të kërkuara, sidomos nga rinia. Kërkesat janë të mëdha dhe pritet një rritje me 20-30 % e kërkesës së shqiptarëve të Kosovës për të kaluar pushimet në Sarandë”, tregon Kurtishja. Përveç pushuesve sezonalë, Saranda është bërë edhe shtëpia e dytë për shumë kosovarë të cilët kanë vendosur të blejnë prona për të jetuar buzë detit. Ndiqni faqen tonë zyrtare të internetit https://euronews.al/al për t’u informuar mbi lajmet kryesore nga vendi, rajoni dhe bota. Abonohuni në kanalin tonë në YouTube: https://bit.ly/3oEW3AU Na ndiqni në Instagram:   / euronews_al.  . Facebook:   / euronews.al   Twitter: https://twitter.com/EuronewsAlbania#e...#tonight