Wayang Golek Munggul Pawenang Bangbang Surapati (Audio Kaset) - Dede Amung Sutarya

Tema : Upaya pelestarian kesenian wayang golek melalui media sosial. SINOPSIS BANGBANG SURAPATI Sinigeug. Di Jonggring Salaka, Batara Guru nu boga gelar di antarana : Sanghyang Otipati, Sanghyang Manikmaya, Sanghyang Jagatnata, Sanghyang Girinata, nu ngawasa mayapada (dunya kadéwatan), madyapada (dunya mahluk halus/goib) jeung marcapada (dunya fana, dunyana manusa di bumi).ngayakeun sawala jeung Batara Narada, Sang Kabayan Déwa. Batara Guru ménta kamandang ti Batara Narada kumaha nungkulan kawah Candradimuka nu terus-terusan ngagolak. Batara Narada nyarankeun supaya ningali di pusaka Kaca Trenggana nu weruh sadurung winarah, nu apal sagala nu can kasorang jeung nu geus disorang. Sabada ditingali, Batara Guru ngabéjakeun ka Batara Narada yén keur nungkulan kawah Candradimuka nu ngagolak nyaéta kudu ditumbal ku bugang jalma budakna déwa kamanusan. Nu disebut budakna déwa kamanusan téh nyaéta Astrajingga atawa Cépot budakna Semar Badranaya/Kudapawana nu katelah déwa kamanusan (Sanghyang Ismaya). Mimitina Batara Guru nitah Batara Narada pikeun turun ka marcapada maéhan Astrajingga, tapi Batara Narada embungeun. Kitu deui budak-budakna Batara Guru saperti Déwa Brama, Déwa Bayu, Déwa Sambu arembungeun maéhan Astrajingga. Antukna Batara Guru ngabéwarakeun ka para raja di marcapada nu ditepikeun ku Batara Narada supaya mawa layon Astrajingga pikeun tumbal kawah Candradimuka. Nu bisa ngalaksanakeun tugas, bakal dibéré hadiah kamulyaan di dunya. Carios salajengna mangga bandungan dugi ka réngsé. Cag!