Opinion - Doreheqja e Ramush Haradinaj ( 10 mars 2005 )

Dorëheqja e Ramush Haradinaj Zhvillimet e 48 orëve të fundit kanë sjellë edhe dorëheqjen e kryeministrit të Kosovës Ramush Haradinaj dhe nisjen e tij vullnetarisht për në Hagë. Kundër tij është ngritur një padi lidhur me krimet e luftës në ish-Jugosllavi dhe kjo ngjarje ka qenë ndër më të diskutuarat në median e shkruar dhe vizive. Pikërisht lidhur me këtë temë drejtuesi i “Opinion” Blendi Fevziu ka zgjedhur të diskutojë në studio me të ftuarit, Baton Haxhiu analist, Luan Hajdaraga zv/minister i Jashtëm, Besnik Mustafaj deputet i PD, Artur Zheji analist dhe në lidhje direkte Shkëlzen Maliqi dhe Alfred Peza. “Haga e kishte vënë në shënjestër Haradinajn. Këtë punë e ka ditur shumë mirë edhe kryeministri”, tha Haxhiu. “Kam lexuar informacione para se të vi në emision dhe di që bëhet fjalë për 17 aktakuza për rolin si ushtarak të Haradinajt. Mendoj që koha dhe elementët janë të pamjaftueshëm për të dhënë një gjykim”, tha Zheji./tvklan.al