နွေဦးတော်လှန်ရေးမှာ ပါဝင်လှုပ်ရှားနေတဲ့ အမေရိကန်နိုင်ငံသား မိုက်ကယ်စလန်းဒစ်

နွေဦးတော်လှန်ရေးမှာ ပါဝင်လှုပ်ရှားနေတဲ့ အမေရိကန်နိုင်ငံသား မိုက်ကယ်စလန်းဒစ် (ရုပ်ပုံလွှာ) မြေလတ်အသံ၊ ဇွန် ၂၅၊ ၂၀၂၄။ ၂၀၂၁ မတရားစစ်အာဏာသိမ်းမှုကနေ စတင်တဲ့ မြန်မာ့နွေဦးတော်လှန်ရေးကို စိတ်ဝင်တစားနဲ့ အားပေးထောက်ခံနေတဲ့ အနည်းငယ်သော နိုင်ငံခြားသားထဲမှာ အမေရိကန်နိုင်ငံသား မိုက်ကယ်စလန်းဒစ်လည်း ပါဝင်ပါတယ်။ သူဟာ အမေရိကန် ချီကာဂိုမြို့က စစ်အာဏာသိမ်းမှုကိုဆန့်ကျင်တဲ့မြန်မာတွေနဲ့အတူ ကမ်ပိန်းတွေမှာပါဝင်လှုပ်ရှားခဲ့ပြီး ၂၀၂၃ မှာ မြန်မာထိုင်းနယ်စပ်ကို ပြောင်းရွှေ့နေထိုင်ခဲ့ပါတယ်။ သူအခုလို ပြောင်းရွှေ့နေထိုင်ရတဲ့ အကြောင်းအရင်းကတော့ မြန်မာ့နွေဦးတော်လှန်ရေးကို အနီးဆုံးနေရာကနေ အားပေးကူညီချင်တာကြောင့်လို့ ဆိုပါတယ်။ သမိုင်းဘာသာရပ်ကိုလေ့လာရင်း ကမ္ဘာ့အနှံ့က ဒီမိုကရေစီရေးလှုပ်ရှားမှုတွေကို စိတ်ဝင်စားလာခဲ့တဲ့သူဟာ တက်ကြွလှုပ်ရှားသူတယောက်အဖြစ် ဒီမိုကရေစီနဲ့ လူ့အခွင့်အရေးလှုပ်ရှားမှုတွေ ဆောင်ရွက်ခဲ့ဖူးသူလည်း ဖြစ်ပါတယ်။ သူဟာ အာရှနိုင်ငံတွေရဲ့ သမိုင်းကြောင်းနဲ့ နိုင်ငံရေးကိုလည်း စိတ်ဝင်တစား လေ့လာနေခဲ့ပြီး မြန်မာနိုင်ငံအကြောင်းကိုတော့ ၂၀၂၁ အာဏာမသိမ်းခင်ကအထိ သတင်းတွေကနေတဆင့် ကြားဖူးရုံလောက်သာ ရှိနေခဲ့တယ်လို့ဆိုပါတယ်။ ၂၀၂၁ ဖေဖော်ဝါရီမှာ မင်းအောင်လှိုင်ဦးဆောင်တဲ့ မြန်မာစစ်တပ်က ၂၀၂၀ ရွေးကောက်ပွဲ မဲစာရင်းမှားယွင်းတယ်ဆိုတဲ့ စွပ်စွဲချက်နဲ့ စစ်အာဏာသိမ်းလိုက်တဲ့အခါမှာ အာဏာသိမ်းမှုကို လက်မခံလို့ ငြိမ်းချမ်းစွာဆန့်ကျင်ဆန္ဒပြတဲ့ အရပ်သားပြည်သူတွေကို စစ်တပ်က အကြမ်းဖက်ဖြိုခွင်းပုံတွေကို မြင်ရတဲ့အခါမှာတော့ မြန်မာအရေးကို သူအာရုံစိုက်မိလာတယ်လို့ ပြောပါတယ်။ ဒါကြောင့် သူနေထိုင်ရာ ချီကာဂိုမြို့က အာဏာသိမ်းမှုကိုဆန့်ကျင်နေတဲ့မြန်မာတွေနဲ့ မိတ်ဆွေဖွဲ့ကာ ရန်ပုံငွေရှာဖွေရေး အစီအစဉ်တွေမှာ သူပူးပေါင်းပါဝင်ခဲ့ပါတယ်။ အဲဒီနောက် သူစုဆောင်းလို့ရတဲ့ ငွေတွေကို စစ်အာဏာသိမ်းမှုကို ဆန့်ကျင်နေတဲ့ အဖွဲ့အစည်းတွေဆီပို့ပေးခဲ့ရာ ခုချိန်အထိ အမေရိကန်ဒေါ်လာ ၃၇,၀၀၀ လောက် ထောက်ပံ့ပေးနိုင်ခဲ့ပြီးဖြစ်တယ်လို့ သူကဆိုပါတယ်။ မြန်မာစကားပြောဖို့ စိတ်အားထက်သန်နေတဲ့ မိုက်ကယ်ဟာ မြန်မာတွေနဲ့ အွန်လိုင်းကနေ မိတ်ဆွေဖွဲ့ရင်း ကြိုးစားသင်ယူလေ့လာခဲ့ပါတယ်။ အဲဒီနောက် မဇင်မာနဲ့တွေ့ပြီး သူက လက်ထပ်ဖို့တောင်းဆိုခဲ့ပါတယ်။ မဇင်မာကလည်း သူ့တောင်းဆိုမှုကို သဘောတူလက်ခံခဲ့ပြီး ၂၀၂၃ မှာ မိုက်ကယ်ဟာ မြန်မာနိုင်ငံနဲ့ အနီးဆုံး ထိုင်းနယ်စပ်ကို ပြောင်းရွှေ့ကာ လင်မယားနှစ်ယောက် အတူပေါင်းသင်းနေထိုင်ခဲ့ပါတယ်။ တဖြေးဖြေးနဲ့ မြန်မာစကားကို မြန်မာတယောက်နီးနီး ပြောလာနိုင်ပြီး ကရင်စကားပါလေ့လာနေတဲ့ မိုက်ကယ်ဟာ လူငယ်တွေကို အင်္ဂလိပ်စာသင်ပေးတာ၊ နိုင်ငံတကာသတင်းဌာနက သတင်းထောက်တွေကို မြန်မာတွေနဲ့ ချိတ်ဆက်ကူညီပေးတာ၊ မြန်မာနိုင်ငံထဲကို လိုက်ပို့တာနဲ့ စကားပြန်အဖြစ် ကူညီပေးတာတွေကိုလည်း လုပ်ပေးဖြစ်ခဲ့တယ်လို့ ဆိုပါတယ်။ ၂၀၂၁ ကတည်းကစတင်ခဲ့တဲ့ မြန်မာ့နွေဦးတော်လှန်ရေးမှာ အမျိုးသမီးနဲ့ လူငယ်တွေအများစု ဒီနေ့အထိ ပါဝင်လှုပ်ရှားနေတာကြောင့် လွယ်လင့်တကူရှုံးနိမ့်သွားမယ့် တော်လှန်ရေး မဟုတ်ဘူးလို့ မိုက်ကယ်က ယုံကြည်နေပါတယ်။ #မြေလတ်အသံ #နွေဦးတော််လှန်ရေး #အမေရိကန် #အမေရိကန်နိုင်ငံသား #မိုက်ကယ်စလန်းဒစ် #ရုပ်ပုံလွှာ