Президенттин өкүлү "сары таш казылбасын" деди/ Алайдагы чуу, арызданган айылдыктар

Алайдын Гүлчө шаарында президенттин Ош облусундагы өкүлү Аманкан Кенжебаев баштаган бийлик органдары эл менен жолугушту. Анда сары таш казуу чыры боюнча да кеп козголду. Айылдыктар облус башчысынан 10 жылдык көйгөйгө чекит коюуну талап кылышты. Кенжебаев президенттин тапшырмасы менен компаниянын кен казууга лицензияларын жокко чыгарууну сунуштап Экология министрлигине кат жөнөткөнүн билдирди. Аталган министрлитин Оштогу башкармалыгынын жетекчиси Эмилбек Орозалиев компания экологиялык экспертиза чыгарып берүүнү сурап өткөн жумада кайрылганын айтты. "Мында сөзсүз түрдө элдин пикири эске алынат. Сары таш казылчу жерге барып дагы текшерип келебиз. Мыйзам боюнча 20 күндө корутунду беришибиз керек, демек 7-июлга чейин бир жаңсыл болот", — деди Орозалиев. Ал эми экология министри Акыл Токтобаев облус башчысынын каты келип түшкөнүн тастыктады. Бирок ал кандай каралып жатканы тууралуу суроону жоопсуз калдырды.