ពិធីសំពះគ្រូ ប្រារព្ធឡើងមុនពេលចាប់ផ្តើមរៀនសូត្រ ឬសម្តែងសិល្បៈទម្រង់បុរាណ

ពិធីសំពះគ្រូ គឺជាទំនៀមទម្លាប់ប្រពៃណីខ្មែរដ៏សំខាន់ ដែលប្រារព្ធឡើងដើម្បីរំលឹកគុណគ្រូបាធ្យាយ សុំសេចក្តីសុខ ជោគជ័យ និងភាពរុងរឿង មុនពេលចាប់ផ្តើមរៀនសូត្រ ឬសម្តែងសិល្បៈទម្រង់បុរាណ។ ជាក់ស្ដែង ដើម្បីត្រៀមការសម្ដែងនៅក្នុងព្រឹត្តិការណ៍នគរសង្រ្កាន្តខាងមុខនេះ ក្រុមការងារកម្មវិធីសិល្បៈទស្សនីយភាពចម្រុះ នៃព្រឹត្តិការណ៍នគរសង្រ្កាន្ត បានរៀបចំពិធីសំពះគ្រូ សូមលោកយាងមកប្រោសព្រុំពរជ័យ ដល់ការសម្ដែងឱ្យប្រព្រឹត្តទៅដោយរលូន និងទទួលបានជោគជ័យ ព្រមទាំងការសាទរពីទស្សនិកជនគ្រប់ទិសទី។ ក្នុងរយៈពេល ៦ យប់ នៃព្រឹត្តិការណ៍នគរសង្រ្កាន្តចាប់ពីថ្ងៃទី១៤ ដល់ថ្ងៃទី១៩ ខែមេសា ឆ្នាំ២០២៦ ក្រុមការងារកម្មវិធីសិល្បៈទស្សនីយភាពចម្រុះ នឹងលើកនូវទម្រង់សិល្បៈ ១៨ ទម្រង់ ដើម្បីសម្ដែងជូនដល់ភ្ញៀវទេសចរជាតិ និងអន្តរជាតិ បានទស្សនាកំសាន្ត។ ទម្រង់សិល្បៈទាំង ១៨ ទម្រង់នោះ រួមមានរបាំព្រះរាជទ្រព្យ របាំប្រពៃណី ល្ខោនខោល សៀក តន្រ្តីបុរាណ អាយ៉ៃរឿង ល្ខោនបាសាក់ ល្ខោនយីកេ ល្ខោនគែន ល្ខោនពោលស្រី ល្ខោនស្រមោលស្បែកធំតូច ប្រគំចាប៉ីដងវែង ល្ខោនអាប៉េ ល្ខោនអាន ល្ខោននិយាយ របាំសហសម័យ តន្រ្តីសំឡេងស្រាល និងតន្រ្តីសហសម័យ។ ចំពោះសិល្បករសិល្បការិនី ដែលនឹងមកសម្ដែងជូនបងប្អូននូវទម្រង់សិល្បៈខាងលើនេះ អញ្ជើញមកពីសាកលវិទ្យាល័យភូមិន្ទវិចិត្រសិល្បៈ សាលាមធ្យមវិចិត្រសិល្បៈ នាយកដ្ឋានសិល្បៈទស្សនីយភាព មន្ទីរវប្បធម៌ និងវិចិត្រសិល្បៈរាជធានីភ្នំពេញ សមាគមសិល្បករខ្មែរ សាលានរោត្តមបុប្ផាទេវី ក្រុមល្ខោនបាសាក់ ភី សុគន្ធធី ក្លឹបសិល្បៈវប្បធម៌យុវណ្ណឌី ក្រុមល្ខោនខោលវត្តស្វាយអណ្ដែត ក្រុមសិល្បៈល្ខោនពោលស្រី វត្តកៀនស្វាយក្រៅ សមាគមសិល្បៈសុវណ្ណភូមិ សហគមន៍ចាប៉ីអមតៈ ក្រុមតន្រ្តីករចម្រុះ និងតន្រ្តីករឯករាជ្យ ក្រុមភ្លេងពិណពាទ្យទេពបទុមវង្ស ក្រុមយុវជនល្ខោនខោលកម្ពុជា និងក្រុមសិល្បៈព្រះកាយច័ន្ទ៕ #នគរសង្រ្កាន្ត #ចូលឆ្នាំថ្មី #ប្រពៃណីជាតិ #កម្ពុជា #nokorsankranta #ns26 #khmernewyear #cambodia #សសយក #កម្ពុជា