Yuk avtomobillarining vazn va hajm me’yorlariga rioya qilinishi nazorat qilinmoqda

Transport nazorati inspeksiyasi tomonidan avtomobil yo‘llarining saqlanishini ta’minlash, yo‘l harakati xavfsizligini oshirish hamda yuk tashish qoidalariga rioya etilishi ustidan tizimli nazorat tadbirlari olib borilmoqda. Nazorat jarayonlarida yuk avtomobillarining belgilangan vazn va gabarit (hajm) me’yorlariga muvofiqligi ko‘chma va statsionar tarozilar yordamida tekshirilmoqda. Me’yorlardan ortiq yuk ortilishi avtomobil yo‘llari va ko‘priklarning muddatidan oldin yemirilishiga, shuningdek, yo‘l harakati xavfsizligiga salbiy ta’sir ko‘rsatishi mumkin. Shuningdek, O‘zbekiston Respublikasining 1118-sonli qonuniga muvofiq, yuk avtomobillarining vazn va hajm me’yorlariga rioya etmagan haydovchilarga nisbatan Transport nazorati inspeksiyasi xodimlari tomonidan mustaqil ravishda ma’muriy choralar ko‘rish vakolati belgilangan. Joriy yilning o‘tgan davri davomida respublika bo‘yicha jami 537 427 ta yuk avtomobili ko‘chma va statsionar tarozilar orqali nazoratdan o‘tkazildi. Nazorat tadbirlari natijasida ortiqcha yuk bilan harakatlangan 8 472 nafar haydovchiga nisbatan ma’muriy bayonnomalar rasmiylashtirilib, qonunchilikda belgilangan tartibda tegishli choralar ko‘rildi. Transport nazorati inspeksiyasi barcha yuk tashuvchilarni yo‘l infratuzilmasini asrash, transport vositalaridan xavfsiz foydalanish hamda yuk tashish jarayonida belgilangan vazn va hajm me’yorlariga qat’iy amal qilishga chaqiradi.