ဆရာကြီးဦးအောင်သင်း၏ ဖြစ်ရပ်မှန် စွန့်စားခန်းစာအုပ်

သရက်ထောင်ဖောက်ခဲ့စဉ်က စာအုပ်သည် ဆရာကြီးဦးအောင်သင်း၏ ဖြစ်ရပ်မှန် စွန့်စားခန်းစာအုပ် ဖြစ်သည်။ ၂၀၁၃ ခုနှစ် စက်တင်ဘာလတွင် ဇွန်ပွင့်စာအုပ်တိုက် မှ ပထမအကြိမ်အဖြစ် ထုတ်ဝေခဲ့သည်။ ဆရာအောင်သင်းသည် ၁၉၄၉ ခုနှစ် ရောင်စုံသူပုန်များ ပေါ်ပေါက်လာချိန်တွင် ရဲဘော်ဖြူများ၏ ဖမ်းဆီးခြင်းခံရကာ မကွေးထောင်၊ တောင်တွင်းကြီးထောင်၊ ပြည်ထောင်၊ သရက်ထောင်များတွင် နေထိုင်ခဲ့ရပြီး ၁၉၄၉ ခုနှစ် နိုဝင်ဘာလတွင် သရက်ထောင်ကို ဖောက်၍ ထွက်ပြေးလွတ်မြောက်ခဲ့သည်။ သရက်ထောင်မှ ထွက်ပြေးလွတ်မြောက်ရန် ကိုတိုင်းမောင်၊ ကိုအောင်ကြည်တို့နှင့်အတူ ကြိုးပမ်းခဲ့သည့်အကြောင်းများကို ရေးသားထားခြင်းဖြစ်သည်။ ပါဝင်သည့်အကြောင်းအရာများ **************************** အကြောင်းအရာများကို အပိုင်းသုံးပိုင်းခွဲ၍ တင်ဆက်ထားသည်။ အပိုင်းတစ်တွင် သရက်ထောင်သို့ ရောက်ရှိလာပုံ၊ ထောင်တွင်းတွင် နေထိုင်စားသောက်ရပုံများ၊ ထောင်ဖောက်ရန် ကြံစည်ကြိုးပမ်းပုံမှ ထောင်အပြင်ဖက်သို့ လွတ်မြောက်သွားပုံတို့ကို ရေးသားထားသည်။ အပိုင်းနှစ်တွင် တောင်တွင်းကြီးမြို့သို့ သွားရန်ကြိုးပမ်းပုံများ၊ အပိုင်းသုံးတွင် တောင်တွင်းကြီးမြို့မှ ရေနံချောင်းမြို့သို့ ခရီးဆက်ရပုံများကို ရေးသားဖော်ပြထားသည်။ ဒီစာအုပ်က ဖြစ်ရပ်မှန် ဇာတ်လမ်း၊ စွန့်စားခန်း အမျိုးအစား လို့ပြောနိုင်တယ်။ လွပ်လပ်ရေးနဲ့ အတူ တွဲပါလာတဲ့ ရောင်စုံသူပုန်တွေ ပုန်ကန်ခဲ့စဉ်ကာလအတွင်း လူငယ် ၃ ယောက်ဟာ ရဲဘော်ဖြူတွေ ကြီးစိုးတဲ့ သရက်မြို့က ထောင်အတွင်းကနေ ဖောက်ထွက်ပြီး အစိုးရတပ် ရှိတဲ့ ရေနံချောင်းကို ထွက်ပြေးသွားတာကို စိတ်လှုပ်ရှားဖွယ် ဖတ်ရှုရမှာပါ။ နိုင်ငံမတည်ငြိမ်တဲ့ကာလမို့ ထောင်ထဲက အကျဉ်းသား ဆိုတာ များသောအားဖြင့် ထိုနယ်မြေမှာ အုပ်ချုပ်နေတဲ့ ရဲ ဘော်ဖြူတွေနဲ့ မတည့်တဲ့သူ၊ သူတို့ကြည့်မရတဲ့သူတွေသာ များပါတယ်။ ပညာရှင် လူကြီးတွေပါထည့်ထားတော့ အချို့ထောင်သားတွေ ထောင်ထဲမှာပဲ ပညာသင်ယူလို့ရတာကို တွေ့ရတယ်။ အသက်အရွယ် မတိမ်းမယိမ်း လူငယ် ၃ ယောက် ထောင် ဖောက် ဖို့ကြံစဉ်တယ်။ သူတို့ကြံစည်တာကို ထောင်သားအချင်းချင်း ပြောပြပြီး လိုက်ချင်တဲ့သူ လိုက်နိုင်ဖို့ ခွင့်ပေးတယ်။ သို့သော် ဘယ်သူမှမလိုက်၊ ထောင်ဖောက်ဖို့ စီစဉ်တာကို ထောင်တာဝန်ရှိသူတွေကို အသိမပေးဘဲ ထားတာကို ထောက်ရှုရင် သူတို့အချင်းချင်း ဘယ်လောက်ထိ စည်းလုံးကြတယ် ဆိုတာ မှန်းဆကြည့်နိုင်တယ်။ ထောင် ထဲကထွက် ဖို့ လှုပ်ရှားပုံ အဆင့်ဆင့်ကို စိတ်လှုပ်ရှားဖွယ် ဖတ်ရမယ်။ ထောင်အပြင်ရောက်တော့လဲ အန္တရာယ် စက်ကွင်းက မပြီး သေး။ အစိုးရ ထိန်းချုပ် နယ်မြေ ဖြစ်တဲ့ ရေနံချောင်း အထိကို သွားဖို့စီစဉ်ရတယ်။ ကုန်းတစ် တန်၊ လှေ တစ်တန်၊ ရေ ကြောင်းမှ ကော၊ မြေလမ်းကြောင်းကပါ ခြေလျင်တစ်ခါ လှည်းတစ် မျိုး အဆင့်ဆင့် သွားရတယ်။ လမ်းခရီးမှာ တွေ့ရတဲ့ အကူအညီတွေ၊ မိတ်ဟောင်းဆွေဟောင်းတွေ၊ ရန်သူ တွေကြားထဲမှာ ကိုယ်ယောင်ဖျောက်ပြီး ပုံစံအမျိုးအမျိုးနဲ့ လှုပ်ရှားသွားလာရတယ်။ ကိုယ်ယောင်ဖျောက်တာကို ဆရာ အောင်သင်းက သင်္ကန်းစီးတာကို အသုံးပြုခဲ့တယ်။ ဆရာက သင်္ကန်းစီးတာကို သာမန်ကာလျံကာ မလုပ်ပဲ....လေးလေးနက်နက် ဆရာတော့်ဆီကနေ သင်္ကန်းတောင်း၊ သီလ ယူတယ်။ ကိုရင်ကြီး အဖြစ်ခံယူပြီး သူငယ်ချင်း နှစ်ယောက်ဖြစ်တဲ့ ကိုတိုင်းမောင်၊ ကိုအောင်ကြည့်တို့ ကပ္ပိယ နဲ့ ဒကာပုံနဲ့ ပုံဖျက်ပြီး ရန်သူတွေဆီကနေ လွတ်အောင် ပြေးခဲ့တယ်။ မှန်ကန်သော လုပ်ရပ်ကြောင့်မို့ အတားအဆီး အခက်အခဲတွေကို ကျော်ဖြတ်နိုင်ခဲ့တယ်လို့ ယုံကြည်မိတယ်။ စာအုပ်ကို ဖတ်နေစဉ်မှာ အဖြစ်အပျက်ကို ကာယကံရှင် ကိုယ်တိုင် ရေးထားတာမို့ ဖတ်ရတာ အရမ်းရိုးရှင်းတယ်။ အများကြီး စဉ်းစားတွေးတောနေစရာ မပါဘူး။ ပေါ့ေပါ့ ပါးပါးလေးနဲ့ ခရီးဆုံးတဲ့အထိ ခေါ်သွားတယ်။ ဖတ်လို့ ကောင်းတဲ့ စာအုပ်ကောင်းတစ်အုပ်ပါ။