‘समाजहितैषि इन्व्हेस्टमेंट गुरू’ महात्मा जोतीराव फुले

महात्मा जोतीराव फुले यांचे द्विशताब्दी जयंती वर्ष सुरू आहे. त्या निमित्ताने त्यांच्या व्यक्तीमत्त्वाच्या, कार्यकर्तृत्वाच्या वेगवेगळ्या पैलूंचा आ’लोकशाही वाहिनीवर वेध घेण्यात येत आहे. महात्मा फुले हे क्रांतीकारक समाजसुधारक होते. सामाजिक-आर्थिक विषमतेचे निराकरण करीत समाजाची स्तरित समाजरचनेतून सुटका करण्यासाठी त्यांनी हरतऱ्हेचे प्रयत्न केले. महात्मा फुले हे स्वतः उद्योजक-व्यावसायिक होते. त्यामुळे या क्षेत्रामधील भल्याबुऱ्याची जाणीव त्यांना होती. सचोटी, प्रामाणिकपणा, उद्यमशीलता आणि श्रमप्रतिष्ठा ही त्यांच्या उद्योजकतेची मूल्ये होती. त्याच मार्गावरून चालण्याचा सल्या त्यांनी तत्कालीन समाजव्यवस्थेला दिला. या मूल्यांचे महत्त्व अधोरेखित करीत असतानाच बाजारातील विविध प्रवाहांविषयी सुद्धा महात्मा फुले अत्यंत चिकित्सक जाणकार होते. त्यामुळेच त्या काळातही शेअर बाजार, सट्टेबाजी यांमध्ये गुंतवणूक करणाऱ्यांना अगर करू इच्छिणाऱ्यांना या मार्गातील चांगल्या-वाईटाची जाणीव करून देण्यासाठी फुल्यांनी मोठे प्रयत्न केले. गुंतवणूक केली तर कशा प्रकारे असावी आणि कशी असता कामा नये, याचे अत्यंत मार्मिक मार्गदर्शन त्यांनी समाजाला केले आहे. त्यांच्या याच पैलूचा सविस्तर वेध सदर व्याख्यानामध्ये डॉ. आलोक जत्राटकर यांनी घेतला आहे. समाजाच्या हिताचा सर्वात आधी विचार करणारे महात्मा फुले ‘इन्व्हेस्टमेंट गुरू’ म्हणूनही कसे श्रेष्ठ होते, हे जाणून घेण्यासाठी हा व्हिडिओ आवर्जून पाहा...