लोहगडवरील ‘अपघात’ नव्हे तर थंड डोक्याने रचलेला खून ?

लोहगडवरील ‘अपघात’ नव्हे तर थंड डोक्याने रचलेला खून; होणारी पत्नी व प्रियकर अटकेत प्रेमसंबंधातून रचला कट; तांत्रिक पुराव्यांमुळे धक्कादायक सत्य उघडकीस तुळजापूर : ज्ञानेश्वर गवळी लोहगड किल्ल्यावरून पाय घसरून पडल्याचा बनाव रचत करण्यात आलेल्या केतन अग्रवाल या तरुण व्यावसायिकाच्या मृत्यू प्रकरणाला आता धक्कादायक वळण मिळाले आहे. हा कोणताही अपघात नसून केतनची होणारी पत्नी सिया गोयल हिने तिच्या प्रियकराच्या मदतीने रचलेला हा एक अत्यंत थंड डोक्याने केलेला खून असल्याचे पोलीस तपासात निष्पन्न झाले आहे. पोलिसांनी दोन्ही मुख्य आरोपींना ताब्यात घेतले असून त्यांनी आपला गुन्हा कबूल केला आहे. ● अपघाताची नोंद आणि पोलिसांना आलेला संशय केतन अग्रवाल हा लोहगड किल्ल्यावरून खाली कोसळल्याची घटना घडल्यानंतर, सुरक्षारक्षक, पोलीस आणि मुलीच्या घरच्यांच्या उपस्थितीत लोणावळा ग्रामीण पोलीस ठाण्यात सुरुवातीला कलम १९४ (बी.एन.एस.एस.) अंतर्गत अकस्मात मृत्यूची (AD No. 36/2026) नोंद करण्यात आली होती. केतन हा एक नियमित ट्रेकर होता आणि त्याने यापूर्वी अनेक ट्रेक्स केले होते, त्यामुळे त्याचा असा अचानक पाय घसरणे पोलिसांना संशयास्पद वाटत होते. त्यानंतर केतनच्या कुटुंबीयांनीही या मृत्यूबाबत तीव्र संशय व्यक्त करत पोलिसांकडे तक्रार दाखल केली. ● तांत्रिक पुरावे आणि 'लव्ह ट्रँगल' उघड मिळालेल्या तक्रारीवरून पोलिसांनी गोपनीय माहिती, साक्षीदार आणि तांत्रिक पुराव्यांच्या (CDR, IPDR एनालिसिस आणि सीसीटीव्ही फुटेज) आधारे सखोल तपास सुरू केला. यामध्ये धक्कादायक बाब समोर आली की, सिया गोयल हिचे पुणे मार्केट यार्ड परिसरात दुकान असलेल्या चेतन चौधरी नावाच्या तरुणासोबत गेल्या एका वर्षापासून प्रेमसंबंध होते. सियाला केतनसोबत लग्न करायचे नव्हते. या विवाहबंधनात केतन आडकाठी ठरत असल्याने सिया आणि चेतन या दोघांनी मिळून त्याला वाटेतून हटवण्याचा पूर्वनियोजित कट रचला. याप्रकरणी लोणावळा ग्रामीण पोलिसांनी कलम १०३ (BNS) आणि ६१(२) अंतर्गत खुनाचा गुन्हा (गु.र.नं. १६८/२०२६) दाखल केला आहे. आधिक तपासात त्यांनी कबुली देखील दिली आहे.