Khit Thit Morning News | May 14 , 2026

Khit Thit သတင်းဌာန၏ မေ ၁၄ ရက် မနက်ပိုင်း ရုပ်သံသတင်းအစီအစဉ် By ရန်ကုန်ခေတ်သစ် ဒီကနေ့ မေ ၁၄ ရက် မနက်ပိုင်း တင်ဆက်ပေးမယ့် သတင်းတွေကတော့ -ရှမ်းပြည်နယ်ရဲ့ မြို့တော် တောင်ကြီးမြို့လယ်မှာရှိတဲ့ ကျပ်ဘီလီယံပေါင်းများစွာတန်တဲ့ အများပြည်သူပိုင်မြေကို ရှမ်းပြည်နယ် ကြံ့ဖွတ်အစိုးရက အဆင့်မြင့်ယာဉ်ရပ်နားစခန်း ဆောက်မယ်ဆိုတဲ့အကြောင်းပြချက်နဲ့ ကြံ့ဖွတ်ပါတီကျောထောက်နောက်ခံရှိတဲ့ သီဟကုမ္ပဏီကို ငွေတန်ဖိုးနည်းနည်း လေးနဲ့ လုပ်ပိုင်ခွင့်ချပြီး ပေးလိုက်တာလို့ ဒေသခံ စီးပွားရေးလုပ်ငန်းရှင်တွေ ပြောပါတယ်။ အကြမ်းဖက်စစ်အာဏာရှင်ဆန့်ကျင်ရေးမှာပါဝင်နေတဲ့ နာမည်ကြီး အဆိုတော် ဖြူဖြူကျော်သိန်းနဲ့ ကမ္ဘာ့ UFC ချန်ပီယံ Van တို့ မလေးရှားနိုင်ငံကိုလာပြီး ချင်းဒုက္ခသည်ကော်မတီ (CRC) ရဲ့ ၂၅ နှစ်ပြည့် အခမ်းအနား တက်ရောက်ပြီး မြန်မာပရိသတ်တွေနဲ့ တွေ့ဆုံမယ်လို့ Chin Refugee Committee (CRC) ဘက်က တာဝန်ရှိသူတစ်ယောက်က ပြောပါတယ်။ မွန်ပြည်နယ် သထုံမြို့နယ်မှာ ကုန်းလမ်းပို့ဆောင်ရေးညွှန်ကြားမှုဦးစီးဌာန (ကနည) ဝန်ထမ်း နေလင်းစိုးက အရက်မူးပြီး လိုင်စင်မဲ့ကားကို ရမ်းကားမောင်းလာရာက ဆိုင်ကယ်စီးလာတဲ့ တက္ကသိုလ် ကျောင်းသူ ၃ ယောက်ကို ဝင်တိုက်မိပြီး ၃ ယောက်လုံး သေဆုံးသွားခဲ့တယ်လို့ သိရပါတယ်။ ဒါ့အပြင် အမှုကိုငွေလျှော်ကြေးပေးပြီး ပိတ်လိုက်နိုင်အောင် ဝန်ကြီးဌာနဘက်က ကြိုးစားနေတယ်လို့ သေဆုံးသူတွေရဲ့ မိတ်ဆွေတွေက ပြောပါတယ်။ အမေရိကန်သမ္မတ ဒေါ်နယ်ထရန့်ဟာ တရုတ်နိုင်ငံနဲ့ ကုန်သွယ်ရေးကိစ္စတွေကိုမြှင့်တင်ဖို့နဲ့ အီရန်၊ ထိုင်ဝမ်အရေးတွေကြောင့် ဖြစ်ပေါ်နေတဲ့ တင်းမာမှုတွေကို ဖြေရှင်းဖို့အတွက် ဗုဒ္ဓဟူးနေ့ (မေလ ၁၃ ရက်) မှာ ဘေဂျင်းမြို့ကို ရောက်ရှိလာခဲ့တဲ့ သတင်းအပါအဝင် မနက်ခင်းသတင်းတွေကို တင်ဆက်ပေးပါမယ်။