தோழர் ப.ஜீவானந்தம் உரை | காந்தியடிகளும் பயிற்றுமொழியும் | Com. Jeevanandham speech | Voice of Jeeva

தோழர் ப.ஜீவானந்தம் காந்தி மன்றத்தில் "காந்தியடிகளும் பயிற்றுமொழியும்" என்ற தலைப்பில் ஆற்றிய உரை. இந்திய கம்யூனிச இயக்க வரலாற்றைத் துவங்கி வைத்த முக்கியமான தோழர்களுள் ஒருவர் ப.ஜீவானந்தம் அவர்கள் . 1963இல் அவர் மறைந்த பின்னர், இத்தனை வருடங்களாக அவரது குரல்பதிவு கிடைக்காமல் இருந்தது. பல்வேறு தரப்பில் இருந்து எடுக்கப்பட்ட தொடர் முயற்சிகளின் வாயிலாக தற்போது கிடைக்கப்பட்டு, மேம்படுத்தப்பட்டு பகிரப்படுகிறது. இந்த உரையை பகிர்வதில் தழல் அமைப்பினர் மகிழ்ச்சியடைகிறோம். இம்முயற்சியில், தங்கள் பங்கை செலுத்திய தோழர்கள் அனைவர்க்கும் எங்கள் நன்றிகள். உழைக்கும் வர்க்கத்துக்காகத் தன்னையே ஆயுதமாக்கிக் கொண்டு போராடிய பல இலட்சம் தோழர்களின் பிரதிநிதி தோழர் ஜீவா. எனும் நிலையில், அவரது குரலை ஆயுதமாக்கி அதன் வழி அரசியலை முன்னெடுப்பது என்பது, வரலாற்றில் வீழ்த்தப்பட்ட ஆயிரம் கரங்களின் சக்தியினை ஆயுதமாகக் கொண்டு மீண்டும் களத்தில் சமர் செய்வது ஆகும். ஆயுதத்தைக் கையளிக்கிறோம். சமரில் இணைவோம் ❤️ குறிப்புகள் : இந்த ஒலிநாடா 50 நிமிட நீளம் கொண்டது. இதில் அவரது உரை முழுமையாக நமக்கு கிடைக்கவில்லை எனினும் உரையின் முக்கிய பகுதி இதில் உள்ளது என்றே கருத முடிகிறது. உரை வெளியான வருடத்தை நம்மால் உறுதியாகச் சொல்ல முடியவில்லை. நமக்கு கிடைத்த spool இல் இரண்டு உரைகள் இருந்தன. அதன் அட்டையின் ஓரிடத்தில் 1962 என இருந்தது. நெல்லைக் கண்ணன் தனது உரையில் ஜீவா கடைசியாக திருப்பூர் சர்வோதய சங்கத்தில் பேசியதாக குறிப்பிடுகிறார். அதனால் 1962 காந்தி பிறந்ததின உரையாக இருக்கும் என உத்தேசிக்கலாம் . மற்றபடி உறுதிப்படுத்த நிலையான ஆதாரங்கள் இல்லாததால் அதை உறுதியாக இறுதியாக அறிவிக்கவில்லை. இதை உழைக்கும் வர்க்கத்துக்கான அரசியல் கடமையாகவே செய்கிறோம். இந்தப் பதிவுக்கு யாரும் உரிமை கொண்டாட முடியாது. இது நம் அனைவருக்குமானது. நாம் எப்போதும் போல "Copy left" தான். எனவே, இந்தக் குரல்பதிவை யார் வேண்டுமானாலும் பயன்படுத்தவோ, பகிரவோ, பதிவேற்றம் செய்யவோ செய்யலாம். எதற்கும் எந்த வித அனுமதியோ தடையோ நிபந்தனைகளோ தேவையில்லை/கிடையாது