Abhivadan Samaroh - M.G.P.V. Baal & Yuva Vakta 2025-26, Sayaji Vaibhav Library, Navsari

ટેકનોલોજી વધી છે, મોબાઈલે માણસોની મહત્ત્વની ક્ષણો છીનવી લીધી છે, લોકો પુસ્તકો વાંચતા જ નથી, એવી ફરિયાદો જો કોઈને હોય તો સયાજી લાઇબ્રેરીના દર મહિનાના પહેલા અને બીજા શનિવારે યોજાતા બાળ અને યુવા વાર્તાલાપમાં જરૂરથી આવશો. વિષય વૈવિધ્ય સાથે પુસ્તકોની પસંદગી, એની રજૂઆત કોઈને પણ નિરાશ ન થવા દે. આજે 2025 -26 દરમિયાન આ પ્રોજેક્ટમાં સહભાગી થયેલા બાળ અને યુવા વક્તાઓના અભિવાદનનો કાર્યક્રમ આયોજિત કરવામાં આવ્યો હતો. અધ્યક્ષ સ્થાને ડો. જનકભાઈ પારેખ અને મુખ્ય વક્તા તરીકે ડો. જય વશી ખાસ પધાર્યા હતા. પોતાના વક્તવ્યમાં પુસ્તકોનું મહત્ત્વ તથા ગ્રંથાલયની ભૂમિકા ખૂબ અસરકારક રીતે બંનેએ શ્રોતાઓના હૃદય સુધી પહોંચાડી. આજના કાર્યક્રમમાં ખીચોખીચ ભરેલા હોલમાં નવસારી શહેરના પ્રબુદ્ધ નાગરિકો, યુવકો તથા બાળકો કાર્યક્રમને માણી શક્યા અને વાચનના મહત્ત્વની પ્રેરણા મેળવી શક્યા. ૧૯૯૫ થી શરૂ થયેલા બાળ વાર્તાલાપમાં અત્યાર સુધી ૯૯૧ બાળકોએ પોતાના ગમતા પુસ્તક વિશે વાત કરી છે. યુવા પેઢી વાંચન થકી જાગૃત થઈને, નીત નવુ વાંચન કરીને શ્રોતાઓ સુધી પોતાની વાતો રજૂ કરે છે, એ જોતા ભાવિ પેઢી માટે ચોક્કસ વિશ્વાસ નિર્માણ થાય છે. શ્રી સયાજી વૈભવ લાઇબ્રેરી દ્વારા નિરંતર ચાલતી, વાંચનપ્રેમ જગાડનારી, સમાજ જાગૃતિની આ અનન્ય પ્રવૃત્તિઓની દરેક પુસ્તકપ્રેમી શ્રોતાઓએ સરાહના કરી.