Shtabi i Përgjithshëm i FA shtron drekë për familjarët e ushtarakëve

Në mjediset e batalionit të Forcave Speciale në Zall-Herr drejtuesit e Forcave të Armatosura shtruan një drekë për fëmijët e familjarët e ushtarakëve. Të pranishëm në këtë aktivitet ishin: ministrja e Mbrojtjes znj. Mimi Kodheli, shefi i Shtabit të Përgjithshëm i FA, gjeneralmajor Jeronim Bazo, drejtues të Shtabit të Përgjithshëm, komandantë forcash dhe batalionesh autonome. Ministrja e Mbrojtjes dhe shefi i Shtabit të Përgjithshëm i FA, përmes këtij aktiviteti social me fëmijët dhe të afërmit e ushtarakëve, i falënderuan ata për kontributin e vyer që japin në shërbim të atdheut, duke shërbyer me përkushtim dhe sakrificë si brenda dhe jashtë vendit. Gjeneralmajor Jeronim Bazo, falënderoi familjarët e ushtarakëve për mbështetjen e pakufijshme për të afërmit e tyre që punojnë në radhët e Forcave të Armatosura. Gjithashtu, duke iu drejtuar ushtarakëve të pranishëm në aktivitet, ai theksoi se: “Në çdo lloj detyre që shërbeni, ju së pari i shërbeni atdheut dhe kërkoj prej jush që kjo detyrë dhe besim i madh që u është dhënë duhet të kryhet me nder dhe përkushtim”. Gjeneralmajor Bazo, shprehu mbështetjen edhe të lidershipit të Ministrisë së Mbrojtjes dhe FA për një kujdes më të mirë ndaj ushtarakëve dhe familjarëve të tyre. “Sot është koha që edhe ne t’ju shërbejmë ju po me të njëjtin përkushtim siç ju i keni shërbyer atdheut”, - nënvizoi gjeneralmajor Bazo. Me këtë rast ai preferoi t'i shërbejë të ftuarve dhe ministres Kodheli.