စစ်မြေပြင်မှာ ပိုပြီး နေရာရလာနိုင်တဲ့ ကတ်ထူစက္ကူ ဒရုန်းများ | People's Spring

စစ်မြေပြင်မှာ ပိုပြီး နေရာရလာနိုင်တဲ့ ကတ်ထူစက္ကူ ဒရုန်းများ အရမ်း လှုပ်လှုပ်ခတ်ခတ် ဖြစ်စေတဲ့ ကိစ္စမျိုး မဟုတ်ပေမယ့် နိုင်ငံတကာ စစ်လက်နက် စောင့်ကြည့်လေ့လာသူတွေ စိတ်ဝင်စားစေမယ့် ကိစ္စတစ်ခုကို ဧပြီ လကုန်ပိုင်းမှာ ဂျပန် ကာကွယ်ရေးဝန်ကြီး ရှင်ဂျီရို ကိုအိဇုမိက ကြေညာခဲ့ပါတယ်။ အဲဒါကတော့ ဂျပန်ဟာ ကတ်ထူစက္ကူနဲ့ တည်ဆောက်ထားတဲ့ ဒရုန်းတွေကို စစ်ရေးမစ်ရှင်တွေအတွက် စတင်ဖြန့်ကျက်နေပြီ ဆိုတာပါပဲ။ အဲဒီကိစ္စကို လူမှုကွန်ရက် မီဒီယာ Xကနေ အသိပေးခဲ့ချိန်မှာ ကိုအိဇုမိက တောင်ပံနှစ်ဖက်အလျား လူ့လက်တစ်ဖက်စာလောက် ကြီးမားတဲ့ လေယာဉ်ပုံ ကတ်ထူစက္ကူ ဒရုန်းတစ်ခုကို ကိုင်တွယ်ပြထားတဲ့ ဓာတ်ပုံတွေကိုပါ ပြသခဲ့ပါတယ်။ ဂျပန်အစိုးရဟာ ဆယ်စုနှစ်တွေနဲ့ချီ ကိုင်ဆွဲခဲ့ဖူးတဲ့ စစ်အင်အား ချဲ့ထွင်မှု ဆန့်ကျင်ရေး မူဝါဒကို လွှတ်ချလိုက်ပြီး ကာကွယ်ရေး အစီအမံတွေကို ကဏ္ဍပေါင်းစုံကနေ မြှင့်တင်လာချိန်မှာ စစ်သုံးဒရုန်းတွေဖက်ကိုလည်း အာရုံစိုက်လာတာ ဖြစ်ပါတယ်။ ကိုအိဇုမိကတော့ သမားရိုးကျ ဒရုန်းတွေနဲ့အတူ စျေးပေါပြီး အလွယ်တကူ အစားထိုးနိုင်တဲ့၊ အများအပြား အသုံးပြုနိုင်တဲ့ ကတ်ထူစက္ကူ ဒရုန်းတွေကလည်း ဂျပန်ရဲ့ အနာဂတ် စစ်ရေး အစီအမံတွေမှာ အရေးပါလာလိမ့်မယ်လို့ ပြောပါတယ်။ စစ်လက်နက် ပစ္စည်းတစ်ခုကို ကတ်ထူစက္ကူနဲ့ တည်ဆောက်ထားတာက နည်းနည်းတော့ ရယ်စရာဖြစ်နေပါတယ်။ တချို့ကလည်း ကလေးတွေ ဒရုန်းနည်းပညာနဲ့ ရင်းနှီးအောင် ကိုယ်တိုင် တပ်ဆင်ဖို့ တီထွင်ပေးထားတဲ့ ဒရုန်း kit ကစားစရာနဲ့ တူနေတယ်လို့ ရယ်ပွဲဖွဲ့ကြပါတယ်။ ဒါပေမဲ့ အဲဒီ ကတ်ထူစက္ကူ ဒရုန်းတွေမှာ ကြီးမားတဲ့ အားသာချက်တွေ ပိုင်ဆိုင်ထားတဲ့ အရှိတရားကိုတော့ လျှော့တွက်လို့ မရပါဘူး။ ပထမဆုံး အားသာချက်ကတော့ စျေးအရမ်းသက်သာတာပါပဲ။ ဒရုန်းတွေကို စစ်မြေပြင်မှာ ဖောဖောသီသီ အသုံးပြုလာခြင်းရဲ့ အဓိက အကြောင်းရင်းတွေထဲမှာ သမားရိုးကျ ဒုံးကျည်တွေနဲ့ယှဉ်ရင် အများကြီး စျေးသက်သာတာကလည်း တစ်ခု အပါအဝင် ဖြစ်ပါတယ်။ ဥပမာ ဒုံးကျည်တစ်စင်းဟာ အမေရိကန်ဒေါ်လာ အနိမ့်ဆုံး သန်းဂဏန်းလောက် တန်ပေမယ့် အီရန် အစ္စလာမ်မစ် တော်လှန်ရေး အစောင့်တပ် (IRGC)က သုံးနေတဲ့ Shahed ဒရုန်းတွေကတော့ မော်ဒယ် အမျိုးအစားအပေါ် မူတည်ပြီး ဒေါ်လာ ၂ သောင်းနဲ့ ၅ သောင်းကြားသာ ကျသင့်ပါတယ်။ ဒါပေမဲ့ ကတ်ထူစက္ကူ ဒရုန်းတွေကတော့ ဒေါ်လာ ၂၀၀၀၊ ၂၅၀၀ လောက်နဲ့ မှာယူနိုင်မှာ ဖြစ်ပါတယ်။ ပြီးတော့ သယ်ယူပို့ဆောင်ဖို့၊ ပစ်လွှတ်ဖို့၊ တပ်ဆင်ဖို့ အရမ်းလွယ်ပါတယ်။ စက်ရုံတွေမှာ ကတ်ထူစက္ကူ ဒရုန်းတွေရဲ့ ကိုယ်ထည်တွေကို ထုတ်လုပ်ချိန် ကတည်းက အပြားလိုက် ခေါက်ထားလို့ရအောင် စီစဉ်ပေးထားပါတယ်။ ဒါကြောင့် ပေါ့ပေါ့ပါးပါးနဲ့ အလွယ်တကူ သယ်ဆောင်သွားနိုင်ပြီး လိုအပ်တဲ့ နေရာကျမှ ခပ်မြန်မြန် တပ်ဆင်လိုက်လို့ ရပါတယ်။ ဒရုန်း အမျိုးအစားအပေါ် လိုက်ပြီး ခဲယမ်းနဲ့ တခြားပစ္စည်းတွေကို ၃ ကီလိုဂရမ်နဲ့ ၅ ကီလိုဂရမ်ကြားလောက် သယ်ယူနိုင်ပြီး အကွာအဝေး မီတာ ၇၀ ကနေ ၁၂၀ ကြားလောက်ထိ ပျံသန်းနိုင်ပါတယ်။ အဆင့်မြင့်တဲ့ ကတ်ထူစက္ကူ ဒရုန်းတချို့မှာဆိုရင် GPS အဆက်အသွယ် ပြတ်တောက်နေရင်တောင် မူလသတ်မှတ်ထားတဲ့ လမ်းကြောင်းကို မှတ်သားပြီး ပျံသန်းနိုင်တဲ့ နည်းပညာတွေ ပါဝင်လာပါတယ်။ ဒီတော့ GPSကို jamming လုပ်ထားတဲ့ ဇုန်နယ်မြေတွေမှာပါ မူရင်းရည်မှန်းချက် မပျက်စီးစေဘဲ ဆက်လက် လှုပ်ရှားနိုင်ပါတယ်။ ရယ်စရာ ကောင်းပေမယ့် ထူးခြားမှု တစ်ခုကတော့ မျက်မှောက်ခေတ် အဆင့်အမြင့်ဆုံး တိုက်လေယာဉ် လက်တစ်ဆုပ်စာလောက်ပဲ ပိုင်ဆိုင်ထားတဲ့ ရေဒါနဲ့ ထောက်လှမ်းမှုကို ရှောင်ကွင်းနိုင်စွမ်း (stealth) စွမ်းရည်ဟာ ကစားစရာနဲ့တူတဲ့ အဲဒီဒရုန်းတွေမှာ အလိုအလျောက် ပါလာတာပါပဲ။ သတ္တုကိုယ်ထည်နဲ့ တည်ဆောက်ထားတာ မဟုတ်တဲ့အတွက် ရေဒါလှိုင်းတွေဟာ အဲဒီ ဒရုန်းတွေကို ထောက်လှမ်းဖို့ ခက်ပါတယ်။ ပြီးတော့ သမားရိုးကျ လေကြောင်းကာကွယ်ရေး ရေဒါတွေဟာ သတ္တုနဲ့ ပလတ်စတစ် ကိုယ်ထည်သုံး ဒရုန်းတွေ အတွက်ပဲ အဓိက တည်ဆောက်ထားလေ့ ရှိပါတယ်။ ဒါကြောင့် ကတ်ထူစက္ကူ ဒရုန်းတွေဟာ တိုက်လေယာဉ်တွေမှာ ဒေါ်လာ ဘီလီယံနဲ့ချီ အကုန်အကျခံ သုတေသနပြုပြီးမှ ထည့်သွင်းထားနိုင်တဲ့ stealth ဂုဏ်ရည်ကို ပိုင်ဆိုင်ထားတာ ဖြစ်ပါတယ်။ ကတ်ထူ စက္ကူဆိုတာကို စဉ်းစားမိတာနဲ့ ပထမဆုံး ဝင်လာတဲ့ သံသယ အတွေးကတော့ ရေစိုခံပါ့မလား ဆိုတာပဲ ဖြစ်ပါလိမ့်မယ်။ ကုန်စည်ပစ္စည်းတွေကို ထုပ်ပိုးတဲ့ သာမန် ကတ်ထူစက္ကူတွေကတော့ ရေစိုဒဏ် မခံနိုင်ပါဘူး။ ဒါပေမဲ့ စစ်သုံးအဆင့် ထုတ်လုပ်ထားတဲ့ ကတ်ထူစက္ကူကတော့ ကောင်းကောင်းကြီး ရေစိုခံပါတယ်။ ပြီးတော့ ကတ်ထူစက္ကူ ဒရုန်းတွေရဲ့ ကိုယ်ထည်မှာ အပေါ်ယံ ဖယောင်းလွှာ ဖြည့်တင်းပေးထားပြီး အတွင်းပိုင်းကို ရေစိမ့်မဝင်နိုင်စေဖို့လည်း သေချာ တည်ဆောက်ပေးထားလေ့ ရှိပါတယ်။ အကြီးစား စက်မှုလုပ်ငန်းသုံး ရေလုံတိပ်တွေ၊ အရည်အသွေးမြင့် ရာဘာ အဆို့တွေကိုပါ တပ်ဆင်ထားတာ ဖြစ်တဲ့အတွက် ပျံသန်းနေရင်း ဆက်ကြောင်းနေရာတွေထဲကနေ ရေစိမ့်ဝင်တဲ့ဒဏ်ကို ကာကွယ်ပေးနိုင်ပါတယ်။ ဒါကြောင့် ကတ်ထူစက္ကူ ဒရုန်းတွေဟာ မိုးရေထဲမှာလည်း စိတ်ချလက်ချ ပျံသန်းရင်း စစ်ဆင်ရေး တာဝန်တွေ ထမ်းဆောင်နိုင်မှာ ဖြစ်ပါတယ်။ ဒါပေမဲ့ ပြင်းထန်တဲ့ ရာသီဥတု အားလုံးမှာ အသုံးပြုနိုင်မယ်လို့တော့ မဆိုလိုပါဘူး။ မိုးဒဏ်ကို ခံနိုင်ရင်တောင် အဲဒီ ဒရုန်းတွေဟာ လေဒဏ်ကို မခံနိုင်ပါဘူး။ ကိုယ်ထည်က အရမ်းပေါ့ပါးလွန်းတာကြောင့် လေပြင်းတစ်ချက် ဝှေ့လိုက်ရင် လေစီးနဲ့အတူ လွင့်ပါသွားနိုင်ပါတယ်။ မိုးသက်မုန်တိုင်း တိုက်ခတ်နေတဲ့ ရာသီဥတုမျိုးမှာ ဒီဒရုန်းတွေကို အသုံးပြုဖို့ မဖြစ်နိုင်သလောက်ပါပဲ။ 𝗣𝗲𝗼𝗽𝗹𝗲'𝘀 𝗦𝗽𝗿𝗶𝗻𝗴 #ludunwayoo #လူထုနွေဦး #PS #People*sSpring #myanmar #NewsMedia #media #politics #international #trending #new #update #info #newsfeed #dailynews #newsupdate #breakingnews #myanmarnews #updatenews #PSA #ကတ်ထူစက္ကူဒရုန်း #ဒရုန်းနည်းပညာ #စစ်မြေပြင်ဒရုန်း #စစ်လက်နက်သစ် #စစ်ရေးဗျူဟာ #စစ်မြေပြင်သတင်း #နည်းပညာသတင်း #နိုင်ငံတကာစစ်ရေး #CardboardDrones #DroneTechnology #MilitaryDrones #CorvoPPDS #ModernWarfare #BattlefieldTech #FutureWarfare #MilitaryInnovation #DefenseTech #ကတ်ထူစက္ကူဒရုန်း #ဒရုန်းနည်းပညာ #စစ်မြေပြင်သတင်း #CardboardDrones #DroneTechnology #ModernWarfare #MilitaryInnovation