Joby Thomas | Catholica visvasam-30 | Visudha kurbana Yeshuvinte sareeravum rakthavum

ആദിമാതാപിതാക്കളുടെ ആദ്യപാപത്തെ തുടർന്ന് ദൈവവും മനുഷ്യവംശവും തമ്മിൽ വലിയ ഒരു വിടവ് സംജാതമായി. ആദ്യപാപത്തിനു ശേഷം ദൈവം മനുഷ്യന് എന്തെങ്കിലും കൃപകൾ (grace) നൽകുന്നുണ്ടെങ്കിൽ അതിന്റെയെല്ലാം അടിസ്ഥാനം യേശുവിന്റെ കാൽവരിയാഗമാണ്. ഇനി യേശുവിന്റെ കുരിശുമരണത്തിന്റെ ഓർമ്മ പുതുക്കുന്ന ഒരു പ്രാർത്ഥനാ ശുശ്രൂഷ അല്ലെങ്കിൽ കർമ്മം നടന്നു എന്നു കരുതുക. യേശുവിന്റെ കുരിശുമരണത്തിലൂടെ സാധ്യമായ കൃപാവരം ഇതിൽ പങ്കെടുക്കുന്നവർക്ക് ദൈവം നൽകുന്നു എന്നുമിരിക്കട്ടെ. അങ്ങനെയെങ്കിൽ ഈ കർമ്മത്തെ ഒരു കുദാശ (sacrament) എന്നു നമുക്ക് വിളിക്കാം. വിശുദ്ധ കുർബാനയിൽ നിരവധി പ്രാർത്ഥനകൾ ഉണ്ട്. എങ്കിലും ഇതിലെ ഏറ്റവും പ്രധാനപ്പെട്ട ഭാഗം എന്നു പറയുന്നത് യേശുവിന്റെ കാൽവരിബലിയുടെ അനുസ്മരണമാണ്. മാത്രമല്ല, വിശുദ്ധ കുർബാനയിൽ പങ്കെടുക്കുന്നവർക്ക് യേശുവിന്റെ കാൽവരിമരണത്തിലൂടെ സാധ്യമായ കൃപ ദൈവം നൽകുകയും ചെയ്യുന്നു. അതിനാൽ വിശുദ്ധ കുർബാന എന്നു പറയുന്നത് ഒരു കുദാശ ആണ്. വിശുദ്ധ കുർബാന യേശുവിന്റെ കാൽവരിയാഗത്തിന്റെ ആവർത്തനം ആണെന്നു പറയാം. എന്നാൽ ഒരിക്കലും അത് ചരിത്രപരമായ ആവർത്തനം (Historical repetition) അല്ല. പിന്നെയോ, കൗദാശികമായ ആവർത്തനം (Sacramental repetition) ആണ്. തന്റെ ശരീരം യഥാർത്ഥഭക്ഷണവും തന്റെ രക്തം യഥാർത്ഥപാനീയവും ആണെന്ന് യോഹന്നാന്റെ സുവിശേഷത്തിൽ (യോഹ 6,53-55) യേശു പറയുന്നു. എന്നാൽ യേശു ഇവിടെ ഉദ്ദേശിക്കുന്നത് ഒരിക്കലും തന്റെ സ്വന്തം ഭൗതികശരീരത്തിലെ മാംസമോ രക്തമോ അല്ല. കാരണം, ഈ വചനം യേശു പറഞ്ഞതിനു ശേഷം ശിഷ്യന്മാരോ മറ്റാരെങ്കിലുമോ യേശുവിന്റെ ശരീരത്തിലെ മാംസം ഭക്ഷിച്ചതായും രക്തം കുടിച്ചതായും ബൈബിളിൽ രേഖപ്പെടുത്തിയിട്ടില്ല. മത്തായിയുടെ സുവിശേഷത്തിൽ, അന്ത്യ അത്താഴത്തിന്റെ വേളയിലേക്കു വരുമ്പോൾ, അതായത് വിശുദ്ധ കുർബാന സ്ഥാപിക്കുന്ന അവസരത്തിലേക്കു വരുമ്പോൾ (മത്താ 26,26-28), ഗോതമ്പ് അപ്പം എടുത്ത് വാഴ്ത്തി ശിഷ്യന്മാർക്ക് നൽകിക്കൊണ്ട് യേശു പറയുന്നു, ഇത് എന്റെ ശരീരമാണ്. അതുപോലെ മുന്തിരി വീഞ്ഞ് വാഴ്ത്തി ശിഷ്യന്മാർക്കു നൽകിക്കൊണ്ട് യേശു പറയുന്നു, ഇത് എന്റെ രക്തമാണ്. ഈ അപ്പവും വീഞ്ഞും ശിഷ്യന്മാർ ഭക്ഷിക്കുകയും ചെയ്തു. അതിനാൽ യോഹന്നാന്റെ സുവിശേഷത്തിൽ തന്റെ ശരീരം യഥാർത്ഥഭക്ഷണവും തന്റെ രക്തം യഥാർത്ഥപാനീയവും ആണെന്ന് യേശു പറയുമ്പോൾ, യേശു ഉദ്ദേശിക്കുന്നത് വിശുദ്ധ കുർബാനയിലെ അപ്പവും വീഞ്ഞും ആണ്. യോഹന്നാന്റെ സുവിശേഷത്തിൽ തുടർന്നുവരുന്ന വചനം ഇങ്ങനെയാണ്, എന്റെ ശരീരം ഭക്ഷിക്കുകയും രക്തം പാനം ചെയ്യുകയും ചെയ്യുന്നവരിൽ ഞാൻ വസിക്കുന്നു (യോഹ 6,56). അതായത് വിശുദ്ധ കുർബാനയിലെ അപ്പവും വീഞ്ഞും ഭക്ഷിക്കുന്നവരിൽ യേശു വസിക്കുന്നു, അഥവാ ജീവിക്കുന്നു. അതിനാൽ വിശുദ്ധ കുർബാനയിലെ അപ്പവും വീഞ്ഞും യേശുവിന്റെ ശരീരരക്തങ്ങളുടെ കേവലം പ്രതീകങ്ങൾ മാത്രമല്ല, പിന്നെയോ അത് യഥാർത്ഥ ക്രിസ്തു തന്നെയാണ്. അതായത്, യേശുവുമായി ബന്ധപ്പെട്ട കൃപകൾ എല്ലാം വിശുദ്ധ കുർബാനയിലെ അപ്പവും വീഞ്ഞും ആയി ബന്ധപ്പെട്ട് ഉണ്ട്. വിശുദ്ധ കുർബാനയിലെ അപ്പവും വീഞ്ഞും കൗദാശികമായി (sacramentally) യേശുവിന്റെ ശരീരവും രക്തവും തന്നെയാണ്. വിശുദ്ധ കുർബാന അയോഗ്യതയോടെ സ്വീകരിക്കുന്നത് വലിയ ഒരു പാപമാണെന്ന് കോറിന്തോസുകാർക്കുള്ള ഒന്നാം ലേഖനത്തിൽ (1 കോറി 11, 27-30) പൗലോസ് അപ്പസ്തോലൻ പറയുന്നു. അതിനാൽ ഗൗരവമേറിയ ഒരു പാപം ചെയ്താൽ കുമ്പസാരിച്ച് പാപമോചനം പ്രാപിച്ചതിനുശേഷം മാത്രമേ നാം വിശുദ്ധ കുർബാന സ്വീകരിക്കാൻ പാടുള്ളൂ.