MCN Economy- Qeveria nis programin e kredisë së butë për biznesin

Qeveria ka nisur zyrtarisht zbatimin e programit "Dyfisho Sipërmarrjen Tënde", një skemë financimi e mbështetur nga garancia sovrane e shtetit, në bashkëpunim me Bankën e Shqipërisë dhe bankat e nivelit të dytë. Programi synon të lehtësojë aksesin në kredi për bizneset që investojnë në modernizim dhe rritje të kapaciteteve, në një periudhë kur vendi po përgatitet për procesin e integrimit në Bashkimin Europian. Për MCN Economy, sipërmarrësi Florian Sekja dhe eksperti i ekonomisë Pano Soko vlerësojnë se mekanizmi është pozitiv, por i pamjaftueshëm për të zgjidhur sfidat me të cilat përballet biznesi. Sekja, e cilëson skemën si një instrument të mirë financimi, pasi ofron interesa të favorshme dhe mbështetje shtetërore deri në 70 për qind. Megjithatë, ai thekson se kufizimet e saj e bëjnë të pamjaftueshme për nevojat aktuale të sipërmarrjeve. Ai kujton se sektori i manifakturës dhe eksportuesit po kalojnë një periudhë të vështirë, duke përmendur se vetëm muajin e fundit manifaktura ka shënuar një rënie prej 14 për qind. Sekja ngre gjithashtu pikëpyetje për mënyrën se si bankat e nivelit të dytë do ta zbatojnë këtë program. Sipas tij, nuk duhet krijuar ideja se kjo skemë është zgjidhja e vetme për transformimin e ekonomisë shqiptare. Nga ana tjetër, eksperti i ekonomisë Pano Soko e konsideron pozitiv faktin që qeveria ka zgjedhur të ofrojë një instrument të ri financimi, por thekson se suksesi i tij do të varet nga mënyra e zbatimit. Ai kujtoi se edhe gjatë pandemisë u vunë në dispozicion fonde të konsiderueshme përmes garancive sovrane, por një pjesë e madhe e tyre nuk u përdor. Sipas Sokos, përgatitja e biznesit për tregun europian kërkon një paketë shumë më të gjerë reformash sesa një linjë e vetme kreditimi, pasi standardet që kërkon Bashkimi Europian shkojnë përtej financimit dhe lidhen me funksionimin e gjithë ekonomisë. #MCN #MCNEconomy