Gang di ruman cu ruman cla pa mata otro den Casnan di Pueblo Noord y Monserat

Un problema andando algun tempo caba ta bay termina practicamente den matamento. Esaki ta un di e tantisimo biahanan cu Polis ta bay atende cu problema entre dos grupo cu den pasado tabata amigo di otro. Mas tristo den henter e asunto aki ta cu den e dos gruponan aki tin un ruman di otro. E problema principal ta dos ruman cu awe kier mata otro y cu sosten di amigonan di cada uno cu ta defendenan contra otro. Den e caso aki tin e conocido Cabez di Clabo cu diadomingo marduga a wordo tira den Korvetstraat. El a haya hasta un tiro bou di su curazon den pecho. Ainda e bala ta den su curpa. Polis a wordo manda diaranzon mainta cu urgencia. E prome informe tabata cu tin losmento di bala den Duartestraat. Ora cu Polisnan a yega a topa dos grupo den un problema basta serio. Den e grupo cu a bin busca problema tabata tey Cabez di Clabo conoci di Polis. El a bin te na e casnan di pueblo unda su ruman ta frecuenta y cuminsa causa problema. Djey nan a sali dale benta abou. Su otro amigonan tambe a yega y asina e dos gruponan a cuminsa manda baranca riba otro. Na mas cu un ocasion a papia di arma di candela pero den e caso aki no a topa arma di candela. Den ambos grupo tin cu a expresa cu nan a mira arma di candela mas cu un biaha den nan poder. Polisnan cu a yega den varios unidad a logra controla e situacion y asina manda e grupo di Cabez di Clabo bek den Monserat. E grupo di cas di pueblo ta tilda Cabez di Clabo di ta Sapo. E ta conta Polis storianan y laga sera hende. Asina hasta su ruman cu awe ta su enemigo el a laga segun e grupo di Duartestraat. E problema aki parce lo no conoce un fin ainda pasobra cada grupo kier regla e asunto riba nan mes. Asina mes e grupo di Duartestraat a expresa cu si Cabez di Clabo y su Grupo no yega cercanan den Duartestraat, no tin ningun problema. Ta dor cu nan ta bin causa problema nan ta sali defende nan mes. Nan a dal Cabez di Clabo diaranzon mainta y mande tera. El a cuminsa grita cu e ta herida di tiro di diadomingo ultimo. Ora el a tende auto di Polis na caminda el a haya forza y boca grandi. Asina el a cuminsa insulta y bira Hulk dilanti Polis. Despues cu Polis a core cune y su amigonan for di Duartestraat, el a bay Canoastraat den e area caminda nan a tire diadomingo marduga. Eynan el a bira malo y mester a pidi ambulance cu urgencia pa hibe Hospital. El a wordo atendi pa loke e tabata sinti despues di causa problema na Noord.