Ёде аз рӯзгори Мирзо Турсунзода ва хона-музейи ӯ дар Хуҷанд

Агар умр вафо мекард, 2-уми майи имсол шоири халқии Тоҷикистон ва қаҳрамони Тоҷикистон Мирзо Турсунзода 111-сола мешуд. Ӯро дар ҷаҳон ҳамчун чеҳраи сиёсӣ, қосиди сулҳ, шоири ватансаро ва фаротар аз он муаррифгари тоҷикону Тоҷикистон дар дунё мешиносанд. Ҳаёташ бештар дар сафар гузаштаву дар замони ҳукумати шуравӣ ба 34 давлати ҷаҳон рафтааст. Мирзо Турсунзода гуфта мешавад, ҳанӯз солҳои 30-уми қарни гузашта ва дар аёми ҷавонӣ ба шаҳри Хуҷанд меояд ва ҳамин тавр аз ин ҷо ба худ ҳамсар меёбад. Соли 1962 ба ӯ хонаеро низ ҳадя мекунанд ва то рӯзи фавт 1977 давоми 15 сол ҳангоми сафарҳояш дар он зиндагӣ мекард. Пас аз вафоташ бо пуштибонии Иттифоқи нависандагони вилояти он вақта (Ленинобод) ҳоло вилояти Суғд соли 1977 хонаашро ба хона-музей табдил медиҳанд, ки 43 сол инҷониб амал мекунад. Хона-музейи шоир воқеъ дар бинои 12, кӯчаи ба ном И.Сомонӣ, паҳлӯи Раёсати донишгоҳи давлатии Хуҷанд ба номи академик Б.Ғафуров ҷойгир аст.