MTOTO MCHANGA AFARIKI DUNIA BAADA YA KUSHAMBULIWA NA FISI, MAMA AJERUHIWA

#HABARI: Mtoto mchanga amefariki dunia baada ya kushambuliwa na fisi katika maeneo mbalimbali ya mwili wake, tukio lililotokea katika Kijiji cha Lambo, Kitongoji cha Haeda, Kata ya Masakta wilayani Hanang', mkoani Manyara huku Mama yake mzazi, Selina Qarabas akijeruhiwa vibaya na kupoteza baadhi ya vidole vya mikono alipokuwa akijaribu kumuokoa mwanawe dhidi ya fisi aliyekua akimshambulia. Mama mzazi wa mtoto huyo Akizungumza mara baada ya kufikishwa hospitali ya rufaa ya mkoa, Selina amesema tukio hilo lilitokea katika kijiji hicho alipokuwa akielekea kuwafuata watoto wake waliokuwa wamekwenda kusaga nafaka na kuongeza kuwa alikuwa amembeba mtoto wake Bahati mgongoni wakati fisi alipowavamia ghafla. Kwa mujibu wa Selina, alijitahidi kupambana na mnyama huyo huku akiomba msaada kwa kupiga kelele, lakini juhudi zake hazikufanikiwa na mtoto huyo alipoteza maisha katika shambulio hilo. Baadhi ya wakazi wa eneo hilo, akiwemo Lucia Langa na Mwalimu Salum Kitalala, wamesema walifika eneo la tukio baada ya kusikia mayowe ya kuomba msaada na kumkuta mama huyo akiwa amejeruhiwa walimpeleka katika Zahanati ya Masakta kwa huduma za awali kabla ya kuhamishiwa Hospitali ya Rufaa ya Mkoa wa Manyara.