ONASIZ ULG’AYDI, TURMUSHIDA ALDANDI, FARZANDI BILAN YER TO’LADA. // SHAXSIY QABUL

Murojaatchi arizasi: Men, ushbu murojaat orqali o‘z hayotiy vaziyatim yuzasidan psixologik va huquqiy yordam so‘rab murojaat qilmoqdaman. Onam men besh yoshimda vafot etgan. Shundan so‘ng otam meni mehribonlik uyiga topshirib ketgan. Maktabni tamomlagach, Qo‘qon shahridagi internat kollejda tahsil oldim. Shundan so‘ng Toshkent shahriga kelib, turli tashkilotlarda ishlab, mustaqil ravishda kun kechira boshladim. Ish faoliyatim davomida bir yigit bilan tanishdim. O‘sha vaqtda mehmonxonada ishlardim. Ishxonam ko‘magida to‘yimiz o‘tkazilib, 2022-yil mart oyida turmushga chiqdim. Afsuski, oilaviy hayotim uzoq davom etmadi. Turmush o‘rtog‘imning oila a’zolari tomonidan kamsitilish, nomimga kredit rasmiylashtirish kabi turli bosim va qiyinchiliklarga duch keldim. Natijada atigi 5 oy yashab, ajrashishga majbur bo‘ldim. Shundan so‘ng yana ish joyimga — mehmonxonaga qaytdim. Ushbu davrda homilador ekanligim ma’lum bo‘ldi va farzandimni dunyoga keltirdim. Hozirda bir nafar o‘g‘lim bor. Ayni paytda davlat tomonidan vaqtincha berilgan yerto‘la (podval)da yashamoqdamiz. Kunlik ishlarda ishlab, tirikchilik qilmoqdaman. Hayotim davomida ko‘plab sinov va qiyinchiliklarni boshdan kechirdim. Hozirgi kunda ruhiy jihatdan charchaganman hamda farzandim kelajagi uchun tashvishdaman. Menga hayotimni yaxshilashda psixologik va huquqiy yordam berishingizni soʻrayman.