༄༅། །ཐེག་ཆེན་ལམ་གྱི་རྩ་བ་དམ་པ་གསུམ་གྱི་རྣམ་བཞག་ངོ་སྤྲོད་སྙིང་བསྡུས།

མཁས་བླུན་སུ་ཡིན་ན་ཡང་དམ་པ་གསུམ་ཚང་བའི་དགེ་རྩ་གང་བསགས་ཐམས་ཅད་སངས་རྒྱས་ཐོབ་པའི་རྒྱུ་ རུ་ལོག་གི་ཡོད། ཆ་རྐྱེན་འདི་གསུམ་མ་ཚང་བའི་དགེ་རྩ་གང་དང་གང་ཞིག་བསགས་ཁུལ་བྱས་ཀྱང་གཟུགས་བརྙན་ཙམ་ལས་དགེ་རྩ་ཡང་དག་པར་ལོག་དཀའ། དེའི་ཕྱིར་དགེ་བའི་རྩ་བ་ཡང་དག་པ་རེ་བསག་འདོད་མཁན་ཚོས་ག་དུས་ཡིན་ན་ཡང་ཁ་ནང་དུ་ལོག་ནས་བསམ་གཞིག་ནན་ཏན་གྱིས་དམ་པ་གསུམ་ཚང་ཐབས་ལ་ཐབས་ཤེས་ཡོད་དགུ་འཚོལ་དགོས། ༡༽ དགེ་རྩ་ཐབས་ཀྱིས་ཟིན་པར་བྱེད་པ་སྦྱོར་བ་སེམས་བསྐྱེད་དམ་པ་གང་ལ་ཟེར་ན། ཐོག་མར་ཕྱག་སྐོར་སྒྲིབ་སྦྱང་སོགས་དགེ་རྩ་ཆེ་ཆུང་གང་ཞིག་བསོག་ན་ཡང་རང་དོན་དུ་མ་སོང་བར་མ་རྒན་འགྲོ་བ་སེམས་ཅན་ཐམས་ཅད་སངས་རྒྱས་ཐོབ་པའི་ཆེད་དུ་དགེ་རྩ་འདི་བསགས་གི་ཡིན་བསམ་པའི་ཀུན་སློང་བཟང་པོའི་ངོ་བོར་བཅོས་དགོས་པ་དེ་ཡིན། ༢༽ དགེ་བ་རྐྱེན་གྱིས་མི་བཤིགས་པར་བྱེད་པ་དངོས་གཞི་དམིགས་མེད་དམ་པ་གང་ལ་ཟེར་ན། ལྷ་སྒོམ་སྔགས་བཟླས་སོགས་ཆོས་གང་ཞིག་གསོག་པའི་སྐབས་སུ་ཁ་གཡེང་མིག་གཡེང་། སེམས་གཡེང་དུ་མ་ཤོར་བར་བློ་སེམས་རྩེ་གཅིག་ཏུ་སྒྲིམ་དགོས་པ་དེ་ཡིན། ༣༽ དགེ་བ་གོང་ནས་གོང་དུ་འཕེལ་བར་བྱེད་པ་མཇུག་བསྔོ་བ་དམ་པ་གང་ལ་ཟེར་ན། ཕྱག་མཆོད་སྤྱིན་གཏོང་སོགས་དགེ་རྩ་གང་ཞིག་བསགས་པའི་མཇུག་ཐོག་དེ་མ་ཐག་ཏུ་དེ་རིང་གི་དགེ་རྩ་འདི་ཉིད་མ་རྒན་འགྲོ་བ་སེམས་ཅན་ཐམས་ཅད་སངས་རྒྱས་ཐོབ་པའི་ཆེད་དུ་འཁོར་གསུམ་དམིགས་མེད་ཀྱིས་རྩིས་ཟིན་པའི་ངང་ནས་བསྔོ་དགོས་པ་དེ་ཡིན། མདོར་ན་རང་གཞན་ཚང་མས་དགེ་རྩ་ཕྲན་བུ་རེ་མིན་བསགས་མ་ཐུབ་རུང་དམ་པ་གསུམ་མམ་སྦྱོར་དངོས་རྗེས་གསུམ་ཚང་ཐབས་ལ་ཅི་ནས་ཀྱང་འབད་གལ་ཆེའོ།