Акафист святому блаженному Павлу Таганрогскому

Чтение акафиста с пением Кондак 1 Избранный угодниче Христов, Егоже ради юродство на себе восприявый и тако в миру поживый, мира суетныя оковы отвергнувый, святый блаженный старче Павле, похвальное приносим ти пение, яко множество чад духовных молитвами и делами благочествия на тесный путь спасения наставил еси, ты же, яко имеяй дерзновение ко Господу, моли избавитися нам всякие язвы душевныя и телесныя, любовию зовущим ти: Радуйся, старче Павле блаженный, Таганрогский чудотворче! Икос 1 Ангелом на земли уподобитися возжелавый, от юности своея богатства и красоты мира сего отвративыйся, отче блаженный, милостыни ради имение родительское расточивый, истинное сокровище на небесех стяжал еси. Мы же, таковому твоему благоразумию дивящеся, с радостию глаголем ти сицевая: Радуйся, корени благороднаго отрасле пречестная, Радуйся, сонаследниче Царствия Небеснаго. Радуйся, класе обильный, из земли кролевецкия прозябший, Радуйся, светильниче веры, в граде Таганроге просиявший. Радуйся, нищелюбия и милосердия ревнителю, Радуйся, любостяжания и сквернаго прибытка обличителю. Радуйся, крине целомудрия благоуханная, Радуйся, молитво ко Творцу непрестанная. Радуйся, старче Павле блаженный, Таганрогский чудотворче!