My Story - Mpawenayo Yves, umurundi wa mbere yakoze ingendeshwa ikoresha umuyagankuba

Akeneye umutahe w’umuriyaridi w’amafaranga y’amarundi (BIF 1,000,000,000) kugira ngo ishirahamwe ryiwe Electromeca rikore imiduga ikoresha umuyangankuba n’imishwarara y’izuba. Umurundi w'umushakashatsi Yves Mpawenayo aherutse gukora imodoka itanywa igiroro. Asanzwe arongoye ishirahamwe @Electromeca_su risanzwe rikora amakinga abagendana ubumuga bw’amaguru bakoresha mu kwiyunguruza. « Abagendana ubumuga nabona bafise ikibazo co kwiyunguruza kuko n’uwufise ikinga yarondera uwumusunika canke naho akaba ariwe aryinyongera ariko bikamusaba inguvu nyinshi. Naciye nkora amaking aborohera kugendesha, ndamaze gukora ayatari make naho uburyo buguma butugora. Naciye kandi mbona ikindi kibazo co kwiyunguruza na cane cane ikena ry’igitoro, naciye ngira iciyumviro co gukora igendeshwa zitanywa igitoro kugira ngo nkigire n’ibidukikije kuko ivyotsi birekurwa n’imodoka zinywa igitoro bironona ibidukikije.» Mw’ishirahamwe ryiwe rimaze gukora ingendeshwa itanywa igitoro ariko ikoresha umuyagankuba. Ngo ubwo bumenyi bwose abukura mu kurondera. Ariko yarize igisata co gukanika imiduga (Electromecanic). “Narakoze ubushakashatsi ku mbuga ngurukanabumenyi. Ingendeshwa amaze gukora ishobora kwunguruza abantu bagera ku munani kandi iyo yayishije ku muyagankuba ibateri ikuzura, ngo ishobora kugenda ibirometero 100. “Biravana n’ubushobozi bwa bateri. Nk’iyi irashobora kugenda ibirometero ijana ibateri yuzuye umuriro. Twebwe akabirya tuzoca dushirako hejuru akuma gafata umuriro uva ku mishwarara y’izuba (solar panel) kugira ngo iriko iragenda igume ishiramwo umuriro uvuye ku mishwarara y’izuba." Agira ati: “Ubushakashatsi bwarageze tugeze ku rugero rwo kuzirwiza zikaba nyinshi. Iragenda, hasigaye guheraheza utuntu tumwe tumwe, nk’ubu dusizeko akuma gafata umuriro uva ku mishwarara y’izuba (solar panel) izoshobora kwongereza nk’ibirometero mirongo itatu. Avuga ko kugira ngo umugambi wiwe uranguke neza afise ikibanza cagutse n’ibikoresho bikwiye vyosaba umutahe w’umuriyaridi umutahe w’umuriyaridi w’amafaranga y’amarundi (BIF 1,000,000,000) kandi yotanga akazi ku bantu barenga 50 mw’ishirahamwe ryiwe Electromeca mugihe ubu asanzwe afise abakozi batatu gusa. #andikamagazine #writeyourownstory #iterambere #burundi