జోగులాంబ శక్తిపీఠం చరిత్ర | అలంపూర్ స్థలపురాణం ALAMPURAM TEMPLE HISTORY.

జోగులాంబా శక్తిపీఠం దక్షయజ్ఞం అనంతరం సతీదేవి శరీరాన్ని మోసుకుంటూ శివుడు సంచరిస్తుండగా, ఆమె పై దవడ పళ్లు (Upper Teeth) ఈ ప్రాంతంలో పడినట్లు శక్తిపీఠ పురాణం చెబుతుంది. అందువల్ల అలంపూర్ అష్టాదశ మహాశక్తి పీఠాలలో ఒకటిగా ప్రసిద్ధి చెందింది. ఇక్కడ అమ్మవారు జోగులాంబా రూపంలో కొలువై ఉన్నారు. జోగులాంబా అమ్మవారి విశిష్ట రూపం ఇక్కడి అమ్మవారి విగ్రహం అత్యంత ఉగ్రరూపంలో ఉంటుంది. అమ్మవారి తలపై బల్లి, తేలు, కప్ప వంటి చిహ్నాలు కనిపిస్తాయి. క్షేత్ర దర్శన మహత్యం ఈ క్షేత్రాన్ని దర్శిస్తే కాశీని దర్శించిన ఫలితం లభిస్తుందని ఈ క్షేత్రానికి దక్షిణ కాశీ అని స్కాంద పురాణములో చెప్పబడినది. కాశీలో ఉత్తర వాహినిగా గంగానది ఉండగా అలంపురములో ఉత్తర వాహినిగా తుంగభద్రానది ప్రవహిస్తున్నది. కాశీలో గంగా యమునల సంగమము ఉండగా అలంపుర క్షేత్రములో కృష్ణా తుంగభద్రల సంగమములు ఉన్నాయి. కాశీలో విశ్వేశ్వరుడు కొలువై ఉండగా ఈ క్షేత్రములో బాలబ్రహ్మేశ్వరుడు కొలువై ఉన్నాడు. అష్టాదశ శక్తి పీఠములలోని విశాలాక్షి కాశీలో కొలువై ఉండగా, ఈ క్షేత్రములో జోగులాంబా అమ్మవారు శక్తి పీఠాలలో ఒకటిగా అనుగ్రహిస్తుంది. కాశీలో వలె ఈ క్షేత్రములో కూడా 64 స్నాన ఘట్టాలతో పాటుగా పాప వినాశనము పేరిట 24 ఆలయములు భక్తులకు దర్శనమిస్తాయి. అత్యంత విశేషమేమిటంటే ఈ క్షేత్రములో గ్రామ దేవత ఎల్లమ్మను మొదలుకొని జగత్పితరులైన పార్వతీ పరమేశ్వరులకు ముక్కోటి దేవతా మూర్తులు ఈ క్షేత్రములో కొలువై ఉన్నారు. ప్రధాన ఆలయములో పరమేశ్వరుడి స్వరూపమైన శ్రీ బాలబ్రహ్మేశ్వర స్వామి తో పాటుగా విష్ణుమూర్తి స్వరూపమైన "సాలగ్రామ" శిలా రూపం కూడా బ్రహ్మేశ్వరుడి ప్రక్కనే ఉండడం శివకేశవులకు అభేదంగా చెప్పవచ్చు