Məcburi köçkün: "Polislər anamı sürüyüb evdən çıxardılar"

Cəbrayıl rayonundan məcburi köçkün olan bu ailə axşam saatlarında onlara müvəqqəti yaşamaq üçün verilən mənzildən çıxarılıb. Sözügedən mənzilin şəhid ailəsinə verildiyi deyilir. Onlar buna etiraz olaraq mayın 5-də Qaçqın və Məcburi Köçkünlərin İşləri üzrə Dövlət Komitəsinin binası qarşısında etiraz aksiyası keçiriblər. Tanrıverdi Rüstəmov deyir ki, onlar bu mənzilə 2009-cu ildə köçürülüb. Mənzil isə öz həmyerliləri olan, nənəsi kimi baxdıqları Gülüşən Balakişiyevanın adına olub. Nənə 2017-ci ildə rəhmətə getdikdən sonra onlardan mənzildən çıxmaq tələb olunub. Qaçqın və Məcburi Köçkünlərin İşləri üzrə Dövlət Komitəsinin mətbuat xitmətinin rəhbəri İbrahim Mirzəyev Meydan TV-yə bildirib ki, Tanrıverdi Rüstəmovun ailəsi bu mənzildə qanunsuz məskunlaşıb. Məcburi köçkün ailəsinə müvəqqəti istifadə məqsədi ilə verilmiş yaşayış sahəsi onların xüsusi mülkiyyəti olmadığından, həmin evlər qanun və ya vəsiyyətnamə üzrə miras kimi başqa şəxslərə (vərəsələrə), həmçinin himayəyə və ya qəyyumluğa götürülmüş şəxsin istifadəsinə verilə bilməz. 2020-ci ildə 44 günlük müharibə zamanı Cəbrayıl rayonu da işğaldan azad edilib. Prezident İlham Əliyevin 2022-ci ildə verdiyi sərəncama əsasən “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” təsdiq edilib və 2030-cu ilədək beş Milli Prioritetindən biri kimi müəyyən olunub. İndi Tanrıverdi Rüstəmovun ailəsi öz yurdlarına köçürülənədək harada qalacaqlarını bilmir.