DHAMMAADKII 22 SANO : Golaha Guurtida Somaliland Oo Guddoomiye Cusub Doortay

Golaha Guurtida Somaliland Oo Guddoomiye Cusub Doortay Kaddib Iscasilaaddii Saleebaan Maxamuud Aadan Golaha Guurtida Somaliland ayaa maanta yeeshay kalfadhi aan caadi ahayn oo taariikhi ah, kaas oo lagu soo afjaray hoggaankii 22-ka sano socday ee Guddoomiye Saleebaan Maxamuud Aadan, isla markaana lagu doortay guddoomiyaha cusub ee hoggaamin doona golaha. Fadhiga ayaa ku furmay aayado Qur'aanka Kariimka ah oo uu akhriyey Sheekh Cabdiraxmaan, kaddib markii la hubiyey tirada mudaneyaasha soo xaadirtay. Xoghayaha Guud ee Golaha Guurtida, Garyaqaan Cabdinaasir Aadan Beegsi, ayaa mudaneyaasha u sharxay habraaca iyo hannaanka loo marayo kalfadhiga gaarka ah. Guddoomiye Saleebaan Maxamuud Aadan ayaa markaas si rasmi ah ugu dhawaaqay inuu baneeyey xilkii guddoomiyenimada, waxaana guddoominta fadhiga la wareegay Guddoomiye Ku-xigeenka Koowaad ee Golaha, Mudane Axmed Cabdi Shide. Intaas kadib, xoghayuhu wuxuu mudaneyaasha u akhriyey waraaqda iscasilaadda, waxaana Golaha cod aqlabiyad leh ku ansixiyey iscasilaadda iyo baneynta xilka. Markii arrintaasi soo dhammaatay, Golaha ayaa u gudbay doorashada guddoomiyaha cusub. Tartanka waxaa ku loollamay saddex mudane oo kala ahaa Xildhibaan Muuse Xaaji Cabdi Ducaale, Xildhibaan Sahal Iidle Dirir iyo Xildhibaan Ismaaciil Sheekh Cabdiraxmaan Muxumed, iyadoo mudaneyaashu codkooda si toos ah ugu doorteen guddoomiyaha cusub. Fadhiga maanta wuxuu ahaa mid si weyn loo adkeeyey amnigiisa, waxaana goobta ku sugnaa saraakiil ciidan oo uu ka mid ahaa taliye ku-xigeenka qaybta galbeedka Hargeysa, taliyaha ilaalada Baarlamaanka, ciidamada ilaalada xarunta Baarlamaanka iyo ciidamo kale oo dheeraad ah. Sidoo kale, hoolka Golaha waxaa buuxiyey marti sharaf tiro badan oo goobjoog u ahayd munaasabadda iyo geeddi-socodka doorashada hoggaanka cusub ee Golaha Guurtida Somaliland.