李泳豪不滿母親被爆昏迷留院ICU 暗示大哥李泳漢係放料者

李泳豪不滿母親被爆昏迷留院ICU 暗示大哥李泳漢係放料者 鼎爺李家鼎嘅前妻施明日前被爆喺屋企發生意外，需要緊急入院接受開腦手術保命，目前喺ICU昏迷留院。呢日施明細仔李泳豪如常開工，佢亦有透露媽媽最新嘅情況。 豪仔透露施明日前完成手術，最危險嘅時間已經過去，但因為現時唔可以去醫院探病，佢哋只可以靠電話同醫生溝通，豪仔話暫時知道媽媽嘅維生指素、腦嘅指數一切都OK：「但醫生都講係咪可以話係好好呢，又唔係，係咪好差呢，亦都唔係，而家係要觀察。」 豪仔表示佢同鼎爺本身係想低調處理呢件事，但結果就畀人放料將事件曝光，令豪仔相當憤怒呀，佢仲話一直都保護緊媽媽嘅私隱，而豪仔同鼎爺都唔會將家事拎出嚟講，但係而家遭人爆料令到謠言滿天飛，豪仔直言希望爆料者收口唔好再講，以免令事件變得更差。 事件發生後，問到豪仔有冇同哥哥李泳漢聯絡過？佢斬釘截鐵咁話唔使同對方聯絡，同時亦表明對方無聯絡過自己，豪仔又話而家可以講嘅係，叫哥哥唔好再講咁多嘢。至於問到係咪覺得哥哥係該名爆料者？豪仔話相信觀眾睇到都會明發生緊咩事。 對於被指媽媽情況嚴重，但豪仔仲有心情同太太出席活動，兼喺社交平台post相，豪仔就話因為當日係自己恩師嘅活動，加上自己早已答應咗對方會出席，所以佢先會現身。豪仔表示自己冇帶情緒出席活動嘅另一個原因，就係唔想俾人察覺到佢屋企有事。至於有傳施明一直唔鍾意台籍新抱仔Agnes一事，豪仔亦再次作出澄清，話根本冇呢件事呀。 #李泳豪 #施明 #昏迷 #李家鼎 #鼎爺 #李泳漢 #TVB #娛樂新聞 #TVB娛樂新聞台 #ENews #HKENews #香港娛樂八卦新聞 #八卦新聞 即刻Follow TVB 娛樂新聞台 Facebook專頁   / tvbenews   登入myTV SUPER享受睇TVB自製節目7日包括娛樂新聞的免費點播 https://bit.ly/2TXLlM0