ALIYEMUUWA MKEWE KWA KUMCHOMA NA MKAA, KESI KUHAMIA MAHAKAMA KUU "WANAMLISHA SUMU YA MANENO"

Kesi ya mauaji inayomkabili mfanyabiashara, Hamis Said anayedaiwa kumuuwa mke kisha kumchoma moto kwa kutumia magunia mawili ya Mkaa, inatarajiwa kuanza kusikilizwa Mahakama Kuu ya Tanzania Kanda ya Dar es Salama, huku kukiwa na mashahidi 28 wa Upande wa Mashitaka. Mbali na mashahidi hao Mkurugenzi wa Mashitaka nchini (DPP) atawasilisha mahakamani hapo vielelezo sita ikiwemo ramani ya tukio la mauaji, maelezo ya onyo ya mshitakiwa, ungamo la mshitakiwa kwa mlinzi wa amani, hati ya kuhodhi mali, ripoti ya Mkemi Mkuu wa Serikali. Hakimu Mkazi Mkuu, Richard Kabate alisema kesi hiyo itasikilizwa Mahakama Kuu na kwamba ushahidi dhidi yake utatolewa naye atapata nafasi ya kujitetea na kuita mashahidi kama atakuwa nao. "DPP ameifahamisha mahakama hii kuwa atatumia vielelezo mbalimbali katika kuendesha ushahidi ambao ni kutoka kwa mashahidi 28 na vielelezo sita," alisema Hakimu Kabate. Hata hivyo, alimuhoji mshitakiwa endapo atakuwa na utetezi pamoja na mashahidi wa kupeleka mahakamani ambapo Luwonga alidai atajitetea mwenyewe na kwamba hatakuwa na shahidi.