FINALMENT JINQABAD FIL-MIŻIEB WARA LI ĦARAB MILL-PULIZIJA

ONE.COM.MT • Ilbieraħ filgħaxija fil-Mellieħa kienet għaddejja operazzjoni ta’ tfittxija għal żagħżugħ bl-isem ta’ Aidan Bartolo wara li l-Pulizija kienet qed isus warajh b’rabta ma’ rejd tad-droga. Il-Pulizija qalet li ż-żagħżugħ saq għal fuq il-karozzi tas-servizz, bil-Pulizija kostretta tispara lejn il-karozza ta’ Bartolo biex twaqqfu. Iż-żagħżugħ ħarab bil-ġiri lejn il-Miżieb fejn inqabad mas-sitt sigħat wara. KITBA EDWARD MONTEBELLO FILMAT B. BONELLO / CMRU Il-Pulizija rnexxielha tarresta lil Aidan Bartolo, żagħżugħ ta’ 24 sena minn Ħal Għaxaq wara li kienet ilha tfittxu għal madwar sitt sigħat fl-inħawi tal-Miżieb. Dan wara li Bartolo ħarab bil-ġiri wara li saq bil-karozza tat-tip Mazda Demio fuq il-karozzi tal-Pulizija li kienu qed isusu warajh. Il-Ħamis filgħaxija, il-Pulizija b’diversi skwadri fosthom dik ta’ Kontra d-Droga u tal-Ispecial Intervention Unit, kienet qed isus wara Bartolo b’rabta ma’ rejd tad-droga. F’mument minnhom Bartolo intebaħ bil-Pulizija u pprova jaħrab u hawn bdiet ġirja warajh bil-karozzi, bil-Pulizija tgħid li dan saq għal fuq il-karozzi tas-servizz. Il-Pulizija qalet li sparat numru ta’ tiri lejn il-karozza biex twaqqaf liż-żagħżugħ. Kien hawn li dan ħareġ mill-karozza u ħarab jiġri lejn l-inħawi tal-Miżieb. F’dak il-ħin, fil-by-pass tal-Mellieħa dehru numru ta’ balal mal-art. Tard il-Ħamis filgħaxija l-Pulizija anki għamlet appell u ppubblikat ritratt ta’ Bartolo biex jinstab iż-żagħżugħ. Fuq l-inħawi tal-Miżieb deher anki ħelikopter tal-Forzi Armati ta’ Malta jittajjar fil-baxx biex jgħin fit-tfittxijiet. Finalment, ftit wara nofsillejl, Aidan Bartolo nqabad mistoħbi qalb il-ħaxix għoli u siġar fl-akwati tal-Miżieb. F’din it-tfittxija ħadu sehem pulizija minn diversi taqsimiet, fosthom l-Iskwadra ta’ Kontra d-Droga u l-Iskwadra tar-Reati Vjolenti fi ħdan id-Dipartiment tar-Reati Maġġuri, l-Ispecial Intervention Unit, Rapid Intervention Unit u t-Taqsima tal-Klieb. Hekk kif ġie arrestat, bħala prekawzjoni r-raġel ittieħed l-Isptar Mater Dei b’ambulanza, hekk kif kien qed isofri minn xi ġrieħi. L-investigazzjonijiet tal-Pulizija b’rabta ma’ dan il-każ għadhom għaddejjin filwaqt li inħatret inkjesta Maġisterjali mmexxiha minn Dr Leonard Caruana. Intant Bartolo mhux l-ewwel darba li xellef difrejh mal-ġustizzja hekk kif erba’ snin ilu weħel 39 xahar ħabs talli kellu fil-pussess tiegħu 31 qartas tal-kokaina. Sena ilu wkoll kien weħel il-ħabs ma’ persuna oħra fuq diversi serqiet minn ħwienet tax-xorb u gabbani.