Data Stories- 7 prill 1992 - Vritet në Tiranë Gaz Muça, gangsteri i parë shqiptar

Më 7 prill të vitit 1992, në Tiranë u vra me armë Gazmend Muça – njohur si gangsteri i parë shqiptar i periudhës së postdiktaturës. I vitlindjes 1969, djali i një berberi me origjinë nga Kavaja, Gaz Muça u bë i famshëm mes bashkëmoshatarëve të vet të rrugës “Bardhyl”, qysh në vitin 1985, në moshën 16-vjeçare, pikësëpari për shkak të aftësive fizike. Adoleshenti Gaz Muça i kishte injektuar vetes besimin e një njeriu fizikisht të pathyeshëm dhe kokëshkëmb, i cili i kishte vënë vetes qëllim që të dilte me patjetër fitues duke ftuar në beteja ‘tek për tek’ me të gjithë të fortët e Tiranës. Gaz Muça shquhej për dashurinë e madhe që kishte për pëllumbat si dhe për kalërimin. Të dytën, dëshirën për të kalëruar, e paguan shtrenjtë. Në vitin 1988, në moshën 19 vjeçare ai vjedh një kalë në fermën “Gjergj Dimitrov” të Saukut, por duke zbritur në rrugën e Elbasanit, përplaset bashkë me kalin me një kamion. Gazi shpëton mrekullisht, por kali ngordh. Gjykata e dënon Gazmend Muçën me 8 muaj burg. Për habi, shteti i kohës vendos ta mbyllë të fortin e rrugës “Bardhyl” në burgun e Spaçit. Gazmend Muça kthehet në Tiranë në vitin pasardhës, 1989. Miqtë rrëfejnë se burgu, jo vetëm që e kishte pjekur, por i kishte shtuar edhe famën. Më tej të njohur në gjithë vendin, Gaz Muçën dhe grupin e tij të keqbërësve, e bën eksodi masiv i vitit 1991 në drejtim të brigjeve italiane, sidomos rrëfimi, gojë me gojë, i disa episodeve të udhëtimit me anijen “Vlora” në drejtim të portit të Barit, ngjarjet e dhunshme në stadiumin “Victoria” të këtij qyteti, që të gjitha të pasqyruara në televizionet kryesore italiane. Në fillim të vitit 1992, pasi Gazmend Muça kthehet në Shqipëri, emri i tij, si një bandit që “vret e pret në Tiranë” përmendet në Parlament edhe nga deputeti Azem Hajdari – një tjetër episod, që shtoi edhe më tepër shpejtësinë e ngritjes përqiell të famës së tij. Pikërisht në këtë periudhë Gaz Muça nis të shfaqet, fillimisht në lagjen e vet, dhe më tej, në gjithë Tiranën, i shoqëruar me një grup djemsh që nuk ta përtonin grushtin turinjve, apo një majë thike. Po kaq shpejt, grupi i Gaz Muçës i qaset edhe lekut. Dëshmohet se fillimisht të hollat i nxirrnin me anë të trukimeve të lojës së bixhozit, ndërsa më pas nisnin t’i bien shkurt: Nisin të sulmojnë pikat ku luhej bixhoz në momentin kur loja përfundonte, duke zhvatur, përmes kërcënimeve, të gjithë xhiron e të hollave. Grupi që shfaqej me egërsinë e një tufe piranjash, përdorte thika, doreza metalike, leva hekuri. Kryesisht dru hanin vetëm ata që nuk e njihnin Gazmend Muçën. Gjatë viteve 1990-1991 piranjat e grupit të Gazmend Muçës nisën të bëhen të famshëm edhe pas inkursioneve te tregu industrial, që njihet si “Pazari i Ri”. Si të ishin në mallin e tyre, aty ata zgjidhnin rrobat më të bukura, përlanin ndonjë magnetofon e të tjera. Ndonjëherë ndodhte që, sapo grupi i të fortëve të shfaqej në krye të rrugës, të gjithë tregtarët të mblidhnin mallim dhe largoheshin në panik. Pikërisht kjo lloj sjelljeje, pas asnjë lloj kthimi mbrapsht, bën që grupi i Gaz Muçës të dallojë mes grupeve të tjera të Tiranës. Ata ishin absolutisht më të fortët. Por për Gazmend Muçën nuk kishte mbetur shumë kohë. Në fillim të prillit 1992, një incident i rëndomtë, ja ndërpret udhëtimin e jetës. Shkak për incidentin bëhej Landi, vëllai i Gazmend Muçës, i cili paraditen e 7 prillit 1992, tenton ti marrë motoçikletën, një të njohuri të tij. Ndërkohë Franc Konomi, një tjetër i fortë i Tiranës, i del në mbrojtje pronarit të motoçikletës duke qëlluar me shpullë Land Muçën. Më tej, duke menduar se i vëllai i Land Muçës, do të hakmerrej, Franc Konomi bind një tjetër të fortë të kohës, Naim Zyberin, që të bëhen bashkë për të goditur Gaz Muçën... #mcntv #mcn #datastories #ferdinanddervishi #histori #ngjarjethistorike #gazmuco