AN-NAML:59-64 #Ahmed_nufais #Malayalam_quran

സുഗ്രാഹ്യവും ചിന്തോദ്ദീപകവുമായ ശൈലിയില്‍ പ്രബോധനം നിര്‍വഹിക്കുകയും അല്ലാഹുവിന്റെ പന്ഥാവ് അനിഷേധ്യമാംവിധം വെട്ടിത്തെളിച്ചു കൊടുക്കുകയും ചെയ്തിട്ടും വരട്ടുവാദങ്ങളുന്നയിച്ചും ദൈവദൂതരെ തള്ളിപ്പറഞ്ഞും കഴിഞ്ഞുകൂടുകയായിരുന്നുവല്ലോ നിഷേധികള്‍. അത്തരക്കാര്‍ക്കു മധ്യേ ആശങ്കയില്ലാതെ പിടിച്ചുനിന്ന മുര്‍സലുകളുടെ സ്ഥൈര്യത്തെയും ദൃഢനിലപാടിനെയും ശ്ലാഘിക്കുകയാണ് അല്ലാഹു. തുടര്‍ന്ന് ഖുര്‍ആന്റെ പ്രഥമ അഭിസംബോധിതര്‍ മുതല്‍ ഈ ഇരുപത്തൊന്നാം നൂറ്റാണ്ട് വരെയുള്ള സകലര്‍ക്കും സുഗ്രാഹ്യമാംവിധം അല്ലാഹുവിനെ കണ്ടെത്താന്‍ പര്യാപ്തമായ അഞ്ചു ദൃഷ്ടാന്തങ്ങളിലൂടെ (സൂക്തം 60-64) മര്‍ത്യകുലത്തെ അഭിസംബോധന ചെയ്യുകയാണ് ഖുര്‍ആന്‍.