Lerikdə uzunömürlülərin sayı azalıb

Lerik rayonu həmişə uzunömürlülərin sayına görə ölkəmizdə ilk yeri tutub. Burada yaşayan, yaşı bir əsri ötmüş soydaşlarımızın sayı daim digər bölgələrə nisbətən çox olub. Amma son illər yaşı 100-ü adlayan insanların sayı azalmaqdadır. Əməkdaşımız lerikli uzunömürlülərdən birinin evində qonaq olub, onun həyat şəraiti ilə maraqlanıb. 168 il ömür sürərək planetin ən uzunömürlü sakini kimi Ginnesin Rekordlar Kitabına düşən Şirəli Müslümovun qardaşı oğlu Söhbət Fərziyev 108 ildir ki, ömür sürür. Onun 16 övladı, 151 nəvə -nəticəsi və 3 kötükcəsi var. Sujetimizin qəhrəmanı Söhbət kişi deyir ki, onun uzun ömür yaşamısının səbəblərindən biri də həyat yoldaşı Tuğra xanımın təbii məhsullardan hazırladığı yeməklərdir. Söhbət kişi deyir ki, ömrünün bu çağına kimi nə siqaret çəkib, nə də spirtli içki qəbul edib. Həmişə dağların təmiz havasını udaraq sağlam ömür yaşamağı üstün tutub. Söhbət kişi soyuq qış günlərində həyat yoldaşı 80 yaşlı Tuğra xanımla gününwn çoxunu isti sobanın yanında keçirir. Bu yaşlı, mehriban cütlük heç bir çətinlik çəkmədən bütün ev işlərini özləri görür. Lerik Rayon Uzunömürlülər Muzeyinin direktoru Dilarə Fətullayeva bildirir ki, rayon sakinlərinin sağlam və uzun ömür sürmələrinin bir sirri də çoxhərəkətli həyat tərzidir. Muzeyin direktoru Dilarə Fətullayeva: “Lakin ekologiya və havanın çirklənməsi ,qidaların süniləşdirilməsi, dağlarda yaşayan insanların da həyat tərzinə istər istəməzmənfi təsir göstərir və insan ömrü getdikcə qısalır.” Qeyd edək ki, rayonda Uzunömürlülər muzeyi yaradılanda yaşı 100-ü ötmüş 200 sakin var idisə, hazırda bu qəbildən olan vətəndaşların sayı 8 nəfərdir.