Aholiga sifatli xizmat koʻrsatish imkoniyatlari kengayib bormoqda

Bugungi kunda mamlakatimizda suv taʼminoti tizimini modernizatsiya qilish, mavjud infratuzilmani tubdan yangilash hamda aholiga koʻrsatilayotgan kommunal xizmatlar sifatini xalqaro standartlar darajasiga olib chiqish davlat siyosatining ustuvor yoʻnalishlaridan biri sifatida belgilangan. Prezidentimiz rahnamoligida sohaga qaratilayotgan yuksak eʼtibor, amalga oshirilayotgan keng koʻlamli islohotlar hamda qabul qilinayotgan muhim dasturlar natijasida suv taʼminoti tizimida mutlaqo yangi bosqich boshlanmoqda. Xususan, soha korxonalarining moddiy-texnik bazasini mustahkamlash, zamonaviy texnologiyalarni joriy etish, energiya tejamkor va samarali uskunalardan foydalanish orqali aholiga sifatli xizmat koʻrsatish imkoniyatlari kengayib bormoqda. Ana shunday ezgu maqsadlar yoʻlida “Buxoro suv taʼminoti” AJ tomonidan ham tizimli va keng qamrovli ishlar izchil davom ettirilmoqda. Jumladan, suv taʼminoti infratuzilmasining barqaror ishlashini taʼminlash, mavjud muammolarni tezkor bartaraf etish, avariya holatlarining oldini olish hamda isteʼmolchilarga koʻrsatilayotgan xizmatlar samaradorligini yanada oshirish maqsadida aksiyadorlik jamiyati tasarrufiga 45 dona zamonaviy maxsus texnikalar topshirildi. Mazkur texnikalar oʻzining zamonaviy imkoniyatlari, yuqori unumdorligi va texnologik qulayliklari bilan tizim faoliyatida muhim oʻrin tutadi. Ular orqali suv tarmoqlarida yuzaga keladigan nosozliklarni qisqa muddatlarda aniqlash, avariya holatlariga tezkor munosabat bildirish, taʼmirlash va tiklash ishlarini sifatli amalga oshirish imkoniyati yanada kengayadi. Bu esa, oʻz navbatida, ichimlik suvi taʼminoti tizimining ishonchliligini oshirish, aholiga uzluksiz va sifatli xizmat koʻrsatish darajasini mustahkamlashga xizmat qiladi.