Шоҳимардон табиати ва инсонларини муаммога тиққан тадбиркорлар

Табиат ва инсон саломатлиги хавф остидами? Сўнгги вақтларда Фарғона вилоятининг Шоҳимардон ҳудудида табиатга нисбатан ўзбошимчалик билан боғлиқ ҳолатлар аҳоли ўртасида жиддий норозилик уйғотмоқда. Айниқса, Оқсув, Дугоба ва тоғ этакларидан оқиб тушувчи мусаффо қор сувларининг йўли тўсилиб, сунъий чўмилиш ҳавзалари ташкил этилаётгани кўплаб саволларни келтириб чиқармоқда. Маҳаллий аҳоли фикрича, мазкур сув манбалари нафақат табиатнинг ноёб неъмати, балки кўпчилик истеъмол қиладиган муҳим ичимлик суви ҳисобланади. Мутахассисларнинг таъкидлашича, инсонларнинг оммавий равишда сувга тушиши сув сифатига салбий таъсир кўрсатиши, унинг ифлосланишига олиб келиши мумкин. Бу эса аҳоли саломатлиги ҳамда атроф-муҳит учун хавф туғдиради. Яна бир ташвишли жиҳат шундаки, қурилиш ишлари олиб борилаётган айрим ҳудудлар кўчки хавфи юқори бўлган тоғ ёнбағирларида жойлашган. Шу боис геологлар, кадастр идоралари, экологик назорат органлари ва бошқа масъул ташкилотларнинг бу масалага муносабати жамоатчиликни қизиқтирмоқда. Табиат барча учун умумий бойлик ҳисобланади. Шунинг учун унинг табиий мувозанатига зарар етказадиган ҳар қандай ҳаракат қонун доирасида баҳоланиши лозим. Аҳоли эса ваколатли ташкилотлардан мазкур ҳолатларни ўрганиб чиқиш, қонунийликни таъминлаш ва табиат ҳамда инсон манфаатларини ҳимоя қилиш бўйича тегишли чоралар кўрилишини кутмоқда. Табиатни асраш — келажакни асраш демакдир.