ديمو كان وأخواتها - ازاي تعمل ديمو عربي ؟

ملاحظات: ١ - ديمو العربي لازم يكون "درس نحو" ٢ - الأمثلة المستخدمة تكون إيجابية، يعني مثلًا ماينفعش (لن أذاكر دروسي) نخليها (لن أقصر في دروسي). ٣ - نحاول ناخد بالنا من الأخطاء الإملائية، وبخاصة الهمزات. ٤ - كلنا بنغلط وكلنا بنتعلم من أخطائنا، فلو اتسألت سؤال ماتعرفش إجابته .. بلاش تجادل وقُل: لأ مش عارف النقطة دي، ممكن حضرتك توضحها لي ؟ ٥ - التوتر هيقل لما تُظبط بداية شرحك وتربط الأفكار ببعضها، لأن تركيزك هيكون على تفاصيل الدرس. ٦ - ممكن تاخد معاك ورقة فيها التحضير اللى هتشرحه أو الأمثلة، لكن خد بالك ... ماينفعش تفضل باصص في الورقة طول وقت الشرح، ممكن تحطها على أي ديسك قدامك وتبصلها مع نهاية كل جزئية أنت شرحتها. ٧ - وقت الديمو مايزدش عن ربع ساعة، ولا يقل عن عشر دقايق أو ٨. ٨ - لو الدرس كبير وتفاصيله كتير، اكتفي بشرح الجزء الأول من الدرس. ٩ - الأمثلة لاتزيد عن ٣ أو ٤، التقويم ٢. ١٠ - أوعى .. أوعى .. أوعى وأنت بتشرح تدي ضهرك للفصل وتبص ناحية البورد فقط !! حاول تقف بزاوية كدة، بحيث أن طرف عينك يكون كاشف الفصل. ١١ - شارك كل المتواجدين معاك في الأسئلة والإجابات.