Мен қызыман Қарақалпақ халқының - Ақшолпан Аманияз қосығы

Сөзи: Ақшолпан Аманияз ________________________________ МЕН ҚЫЗЫМАН ҚАРАҚАЛПАҚ ХАЛҚЫНЫҢ Мен қызыман, қарақалпақ халқының, Мақтанарлық, көп дәстүри, салты дым, Кеўилиндей кең сахрада туўылып, Қушағында ойнап-өсип шалқыдым. Мен қызыман, қарақалпақ халқының, Асаў Әмиў суўларынан нәр алған, Қайсарлығы, ғайбарлығы, халқымның, Тамырымда қаным менен таралған. Мен қызыман, қарақалпақ халқының, Ўатан ышқы көкирегин кернеген, Жүрегимде толып атыр жырларым, Ақ қағаздың жүзин еле көрмеген. Мен қызыман, қарақалпақ халқының, Гулайымдай батыр қыздың сиңлиси, Қумар ана, Жупар бийдей, даналар, Мениң ушын дилўарлықтың үлгиси. Мен қызыман, қарақалпақ халқының, Қыз намысын, ел намысы деп билген, Шаңарақта, егер туңғыш перзенти, Қыз туўылса “дәўлет басы” деп билген. Мен қызыман, қарақалпақ халқының, Тумар етип таққан, ийбе, хаясын, Өтмишлерде, жаўга қарсы, шапқанда, Уран еткен, ақ сүт берген анасын. Мен қызыман, қарақалпақ халқының, Шырайына ай-жулдызлар ынтыққан, Миллий шапан тал бойына жарасып, Көк койлегим, нағысларға сығасқан. Мен қызыман, қарақалпақ халқының, Қарамық көз, қасы оқ жай керилген, Ақ жүзинде күлгишлери ойылып, Қолаң шашы қос бурым боп өрилген. Мен қызыман, қарақалпақ халқының, Шайыр болып сөзден дүрлер төгемен, Сен дегенде, йош-илхамым тасады, Халқым сени жандай жақсы көремен. Акшолпан Аманияз 08.02.2018 жыл